PM Taur Husu MTKI "Sulap" Lagoa Maubara no Erauolo Sai Lalehan Turizmu Nian

Ministru Turizmu Komérsiu no Indústria (MTKI) José Lucas do Carmo da Silva ko'alia ba média sira iha Palásiu Governu Ministru Turizmu Komérsiu no Indústria (MTKI) José Lucas do Carmo da Silva ko'alia ba média sira iha Palásiu Governu Foto Tempo Timor

Tempotimor (Dili)-Primeiru Ministru (PM) Taur Matan Ruak orienta Ministru Turizmu Komérsiu no Indústria (MTKI) José Lucas do Carmo da Silva hodi transforma Lagoa Maubara no Erauolo sai sítiu turizmu komunitáriu.

Tuir komunikadu imprensa husi Palásiu Governu ne'ebé www.tempotimor.com asesu katak PM Taur orienta ministru José Lucas do Carmo da Silva atu dezenvolve Lagoa Maubara no Erauolo

"Kuarta (13/08) ne’e iha PG, PM Taur orienta Ministru MTKI José Lucas atu dezenvolve Lagoa Maubara, Munisípiu Likisá, ne’ebé iha tempu okupasaun Indonésia sai tiha ona hanesan fatin destinasaun ba turístika lokál maibé hafoin ukun an, sítiu ne’e abandona hela," dehan iha komunikadu imprensa husi PG ne'ebé tempotimor.com asesu, Kinta (13/08)

Xefe Ezekutivu hakarak dezenvolve fali-fali fatin turizmu ne’e hodi halo kombinasaun hamutuk ba turizmu tradisionál, istórikal, kultural no ekolójiku.

"Iha Lagoa Maubara, Xefe Ezekutivu sujere atu harii mós réplika uma lisan reprezentante hosi Munisípiu 12 no RAEOA nu’udar identidade kultural atu bele atrai turista sira ba vizita sítiu Lagoa Maubara," sita iha komunikadu imprensa

Aleinde ne’e xefe governu mós propoin atu halo jestaun ba lafaek iha lagoa refere, tanba tuir PM, daudaun ne’e lafaek barak fuik no abandona iha tasi no mota sira ne’ebé dala barak hakanek no oho komunidade sira, inklui ameasa ba fatin turizmu sira, tanba ne’e lafaek sira ne’e presija rekolla tiha hodi tau iha lagoa no jere hosi ema profisionál hodi bele atrai vizitante sira ba haree.

Eis PR ne’e, mós orienta atu dezenvolve Lagoa Erauolo iha Munisípiu Ermera, hanesan fatin hakiak ikan nune’e ba futuru mai bele sai hanesan fatin atraksaun ba hakail ikan.

"Wainhira sei Prezidente Repúblika, iha nia vizita ida ba fatin ne’ebá, haree lagoa ne’e furak maibé abandonadu, entaun atual Xefe Governu ko’alia ho autoridade komunitáriu iha tempu ne’ebá i sira apoiu ideia refere. Xefe Governu hein katak wainhira fatin sira ne’e dezenvolve ho di’ak no iha jestaun di’ak sei hatama reseita ba estadu nomós bele kontribui hasa’e ekonomia komunidade sira ne’ebé hela besik," tenik husi komunikadu

Eis Xefe Estadu Maior Jenerál F-FDTL ne’e iha esperansa katak ho mandatu hela tinan rua resin ne’e, governante sira tenke halo esforsu maximu hodi dezenvolve fatin turizmu sira ne’e, i ne’e momentu oportunu atu avansa iha setor turizmu hanesan únika fonte iha futuru ne’ebé bele troka petróleu hodi hatama reseita ba Estadu, wainhira mina maran.

"Enkuantu fatin rua ne’e iha ona konseitu ba dezeñu ne’ebé prepara hosi asesór tékniku Primeiru-Ministru nian no hein MTCI bele follow-up liután iha estudu viabilidade, hodi hatama ba planu orsamentu tuir mai," sita iha komunikadu

Entretantu Ministru Turizmu Komérsiu no Industria José Lucas do Carmo Silva responde pozitivu instrusaun Xefe Governu nian ne’e, no sei tau ba programa prioridade iha mandatu ida ne’e, aleinde ne’e tama ona iha planu MTCI nian planu rehabilitasaun ba fatin turístiku sira hanesan Kristu Rei-Dili, Bee Manas Marobo no seluk tan, inklui Ministériu ne’e mós halo hela konseitu turizmu komunitária nian, oinsá mak atu suporta inisiativa lokál iha turizmu komunitária.

Rate this item
(0 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.