"Ohin (sesta, 27/08), ita-nia ekipa halo ona investigasaun no aplika multa ba sidadaun timoroan na'in-26 ne'ebé antes ne'e kompleta ona loron 14 iha kuarentena Munisípiu Covalima tanba hakat ilegál fronteira terestre", dehan Diretór Jerál Servisu Migrasaun, Superintendente Asistente, Luis Soares Barreto, liuhusi komunikadu ne'ebé www.tempotimor.com asesu, sesta (27/08).

Aplikasaun multa ida ne'e, hafoin proseu investigasaun ba sidadaun relasiona ho movimentu ilegál husi fronteira terrestre iha semana kotuk.

Hafoin parte Imigrasaun konklui prosesu administrasaun multa hotu sei entrega ba PNTL parte Investigasaun Nasionál hodi prosesu kontinuasaun ba Ministériu públiku.

"Ita aplika multa másimu US$250.00 ba sidadaun sira ne'ebé konsege tama ilegál liuba área Indonézia nian, enkuantu sira ne'ebé halo negósiu ilegál ita aplika US$30.00", afirma nia.

Enkuantu, prosesu multa ida ne'e, parte servisu migrasaun sei aplika hanesan mós sidadaun sira ne'ebé oras ne'e daudaun sei iha hela kuarantene hodi aplika sansaun hanesan. (*)