"Enkontru ida ne'e, ho organizadór, mobilizadór no motivadór sira ajente kooperativa nian ne'ebé mak kolokadu iha kooperativa sira ne'ebé konsentre iha Dili, hamutuk kooperativa sanolu, atu sira bele motiva, organiza populasaun sira iha nível suku hodi haburas e hari’i kooperativa iha suku ne'ebé seidauk hari'i, nomós haburas kooperativa ne'ebé mak estabelese ona iha nível suku, atu nune'e ema rihun-ida-atustolu (1.300-resin), nu'udár sidadaun iha Dili, bele hola parte iha kooperativa”, dehan Elizário Ferreira, iha Salaun Kooperativa Federasaun Hanai Malu (FHM), Lanud, Bairo Pite, tersa (14/09).
Organizadór hirak ne'e, maioria husi membru kooperativa nian, no parte SEKoop kontrata sira atu ba halo servisu ho voluntáriu iha nível suku hodi organiza populasaun atu hola parte iha kooperativa.
"Enkontru ida ne'e, ema bolu dehan katak, mellora tarrefa de traballu organizadór sira-nian. Tanba ida ne'e, hadi'ak filafali sira-nia tatrefa traballu, atu sira bele hala’o servisu di'ak liután, atu nune'e bele kontribui ba dezenvolvimentu kooperativa nian, ba dezenvolvimentu ekonómia nasionál nian", afirma Elizário.
Tuir planu, iha tempu besik, parte SEKoop mós sei halo reuniaun ho organizadór sira ne'ebé destakadu iha munisípiu ida-idak hodi hadi’a sira-nia tarefa servisu iha nível baze.
"Sei hala'o mós enkontru iha nível munisípiu ba kuantidade pesoál, bazeia ba nível postu, tanba postu ida ema na'in-rua. Sé munisípiu ida iha postu lima, siknifika ema na'in-sanolu. Iha Dili ne'e barak liu, tanba sira mai husi membru kooperativa sira", informa nia.
Responsável másimu ba Organizadór Kooperativa iha Munisípiu Dili, Francisco Ángelo Ximenes hatete, durante fulan ida, husi 15 juñu to'o jullu iha ema na’in-15 tuir formasaun, sira-nia servisu iha kampu ka baze mak sai hanesan ema organizadór, mobilizadór, no motivadór ba atividade kooperativa.
Maibé, durante ne'e atividade la la'o, tanba impaktu husi Serka Sanitária ho Konfinamentu Obrigatóriu, ne'ebé bandu ka limita ema atu halibur malu liu na'in-sanolu ba leten.
"Ami husi funsionáriu SEKoop, hanesan ohin sekretáriu estadu ko’alia, tanba ami-nia kna'ar motivadór, mobilizadór, no organizadór. Entaun, durante dia 15 de jullu depois formasaun, entaun ami-nia tarrefa servisu ne'e hahú iha dia 01 de Agostu. Tan ida ne'e mak ohin ami enkontru ho Sua exelénsia sekretáriu estadu kooperativa, atu fahe servisu ba oin ne'e, ho di'ak liu tan", dehan nia.
Entretantu, iha loron 15 fulan-juñu to'o 15 jullu tinan 2021 ne'e, SEKoop liuhusi nia formadór sira, fasilita ona formasaun ba ajente organizadór, mobilizadór no motivadór hamutuk ema na'in-200 husi munisípiu 12 iha RAEOA, iha Salaun São José, Igreja Katedrál Dili, atu transforma doutrina kooperativa nian, hodi haburas to'o iha área rurál sira.
Munisípiu Dili, kompostu husi Postu Administrativu 6, Ataúro, Cristo-Rei, Dom-Aleixo, Metinaro, Na'in-Feto, Vera-Cruz, no Suku hamutuk 36. (*)