Família Vítima, Maximiano de Oliveira hatete, ema deskoiñesidu mak sona ninia alin Octavio iha Área Lalapan Domin, Bairo Matadoru bainhira fila husi servisu fatin GMN, iha loron tersa (12/04) kalan.

“Ha'u hanesan maun boot husi Atako, iha momentu ne'e, iha tuku 9 liu minitu 20, Atako fila uma tuku odamatan, (maun-maun sai lai mai) ne'ebé ha'u hanoin naran sá, nia mai nia iha kanek todan, ha'u haree uluk nia kanek iha kotuk, ne'ebé ha'u husu dehan hanusa, nia dehan ema sona nia, entaun ha'u hanoin iha kotuk de'it, ha’u hiit tiha faru rán nakfakar sai, ne'ebé ha’u bolu tan ha'u-nia kaduak mai, ami lori kedan ba HNGV”, informa Maximiano de Oliveira liuhusi konferénsia imprensa iha Aldeia Halibur, Suku Motael, kinta (14/04).

Kazu sona vítima Octavio ne'e akontese Área Lalapan Domin, Bairo Matadoru, Suku Vilaverde, Postu Administrativu Vera Krus, loron tersa (12/04), maizomenus tuku 21 liu minutu 20, ne'ebé ema sona vítima hodi rezulta kanek todan iha parte kotuk no oin.

Ba aktu krime ne'e, mak família vítima hamutuk ho rerezentante husi Grupu Media Nasonal kondena hahalok ne’e no husu ba Polísia Nasionál Timor-Leste (PNTL) atu prosesa no buka tuir autór ba kazu ida ne'e.

Vítima Octavio durante iha nia moris, nuka ransu, no wainhira sai servisu nia fila kedas ba uma, no dala ruma mak nia la'o ho kolega sira ba halo vídeo hamutuk, no pasiar, ida ne'e de'it, maibé nia nunka inklina-an iha grupu arte marsiál.

“Problema hanesan arte marsiál, ka grupu-grupu ne'e laiha, ami família hatene ida ne'e nia laiha”, hatete nia.

Tanba ne'e, família vítima mós hato'o ona keixa ba PNTL, no família fiar katak polísia sei kaptura autór ba kazu ida ne'e hodi prosesa tuir dalan justisa.

“Tuir kronolojia ne'ebé Atako konta mai ha'u, katak, ema sona nia ne'e iha Lalapan nia oin, ema ne'e nia haree dehan para motorizada iha ne'eba, motorizada mio kór azul, e depois uza faru mutin maibé oin nia la haree, tanba esponta, e depois sona nia dala rua iha oin, e depois nia halai mak sira sona tán nia iha kotuk”, afirma nia.

Diretór Produsaun no Programasaun husi Grupu Media Nasional (GMN), Isabel Fernandes hatete, iha momentu loron tersa (12/04), kalan maizomenus tuku 8 hanesan ne'e sira iha duni programa transmisaun direta ida ba programa espesiál ba paskua ninian.

Iha tempu ne'eba, vítima mós hola parte sai hanesan plotelektór iha transmisaun direta ida ne'e, no programa ne'e hahú husi tuku 8 to'o ensera iha tuku 9 kalan.

"Iha kalan ne'e, komu kolega sira inklui Atako mai ho motorizada, entaun ami komunika malu para sira ne'ebé mak ho motorizada sira bele fila sedu, e seluk ho transporte GMN nian hodi fila ba ida-idak nia uma, ida ne'e normalmente babain halo iha GMN”, dehan nia.

Tanba ne'e, sira-nia parte fó apoiu ba família vítima sira, atu entrega kazu ne'e ba NTL hodi buka autór ne'ebé komete krime ida ne'e. (*)