Ministru Defeza no Interiór interinu, Filomeno Paixão, konsidera kazu osan falsu hanesan kazu burla internasionál. 

"Krime ne'ebé la'o iha ne'ebá (Indonésia) bele krime internasionál. Nia implikasaun bele mai iha ne'e, entaun se iha ne'ebá burla eravada ema iha ne'ebá bele burla ema iha ne'e," dehan Paixão, iha Palásiu Prezidensiál, Bairru-Pité, Kuarta (11/3). 

Eis-Vise Xefe Estadu Maiór Jenerál FALINTIL-FDTL ne'e hateten, dadaun ne'e investigasaun kontinua la'o, nune'e obrigasaun ba Ministériu Interiór atu akompaña no PNTL sei buka dalan atu fornese informasaun husi Timor ba Indonézia, inklui husi Indonézia mai Timor hanesan Ministériu Públiku. 

Tuir Paixão, Prezidente Repúblika mós hateten, kazu ne'e iha Indonézia no entrega ba Tribunál Indonésia mak deside. 

"Husik ba ita lalika ansi, ita fiar ba Tribunál Indonézia hanesan mós Tribunál Indonézia fiar mai ita," dehan Paixão. 

Entertantu, kazu osan falsu viral iha média sosiál ne'ebé deskonfia envolve husi sidadaun timoroan no kazu ne'e parte Polisia Indonézia kaptura iha fin-du-anu 2019 no daudaun ne'e kontinua iha investigasaun laran. (*)