Provérbio ne’e atu fó haoin katak, hirak ne’ebé foin koko atu hala’o domin ne’e tenke kuidadu didi’ak tanba, domin ne’e naturalmente lori ksolok no gostu, maibé espontaneamente bele lori mós dezastre.

Hanesan akontese ba lezada ODM ne’ebé tenke simu tudik modo husi ninia eis namoradu LBB tanba de’it lezada husu atu hapara domin entre sira na’in rua, ne’ebé sira haki’ak ona durante tempu balun.

Situasaun mosu iha aldeia Moris-Foun, Suku Comoro, Postu administrativu Don Aleixo, munisípiu Dili, 16 novembru tinan ne’e.

Portavoz Komandu Jerál Polísia Nasionál Timor-Leste (PNTL) Arnaldo de Araújo hateten, lezada hetan kanek, tanba lia-fuan domin la kondís, entaun suspeitu LBB lori tudik hodi tá lezada iha parte ulun to'o ran.

"Hakarak informa, iha dia 16 Novembru 2020, oras tuku 9:50, iha aldeia Moris Foun, Comoro Kampung Baru, iha insidente oan ida ne'ebé mosu iha ne’ebá", Arnaldo informa situasaun ne’e liu-husi konferénsia imprensa iha Komandu Jerál PNTL Kaikoli, Tersa (17/11).

Nia konta tuir katak, lezada ne'e kanek, tanba de'it suspeitu nia domin la satisfeitu ho lia-fuan ne'ebé alin feto ne'e fó sai katak, nia lakohi ona nia namoradu ne'e, entaun nia namoradu ho emosaun foti tudik tá ninia namorada nia ulun to'o kanek.

Kondisaun ikus, suspeitu oras ne’e daudaun detein hela iha sela Polísia Nasionál Timor-Leste Munisípiu Dili, hodi hein prosesu investigasaun no lezada iha hela ninia uma hafoin hetan tratamentu saúde intensivu iha ospitál.