Komandante Polísia Nasionál Timor-Leste Eskuadra Dom Aleixo, Munisípiu Dili, Inspetór Assistente Américo Fátima hatete, tuir observasaun temporáriu PNTL hatudu pursentu h9itunolu-resin-lima (75%) deskonfia matebian Levi Gomes mate, tanba oho-an rasik la'ós ema mak oho.
Tanba iha lokraik, matebian rasik mak kadi tudik ida dehan atu uza ba kua-modo, maibé iha tuku 8 kalan matebian uza tudik ne'e kua nia kakorok hodi hakotu iis.
“Lokraik ne'e nia rasik mak kadi tudik ne'e, nia família sira dehan atu uza ba kua-modo nia dehan, husik ha'u mak kadi par kroat, ne'e mak nia rasik mak kadi tudik ne'e halo kroat tiha, depois fali kalan akontesimentu iha 8 oras, vítima kua nia kakorok iha fatin, fatin akontesimentu ne'e Bebonuk aldeia 20 de Setembru besik eskola, ami to'o ema ne'e mate kedas iha fatin, ita evakua ba ospitál para halo otopsia”, dehan Inspetór Assistente Américo Fátima, iha Eskuadra Dom Aleixo, Komoro, kuarta (09/02).
Tuir observasaun temporáriu PNTL eskuadra Dom Aleixo nian katak, 75% mak matebian mate oho-an, enkuantu 25% sei deskonfia hela.
“Maibé ami-nia indikasaun ne'e katak, ami-nia observasaun temporáriu ba mate ne'e katak, kuaze 75% ne'e nia oho-an, 25% ami sei deskonfia, tanba laiha indikasaun uza forsa, laiha indikasaun sasán ruma aat, laiha ema ruma halo ofensa ba nia”, dehan nia.
Antes ne'e, matebian Levi Gomes istori malu ho nia ferik oan, inklui matebian mós sofre hela moras seluk ne’ebé prejudika, maibé moras ne'ebé vítima iha seidauk identifika, tanba sei iha hela prosesu otopsia.
Matebian Levi Gomes durante ne’e halo kna’ar iha Jornál Diáriu Timor Post hanesan sirkulasaun jornal. (*)