Suspeita Covid-19, OMS Haruka Amostra ba Darwin 

Mediku sira halo izame hela ba ema moras balun Mediku sira halo izame hela ba ema moras balun Foto Facebook

Tempotimor(Dili) - Ospitál Nasionál identifika suspetiu moras Corona Virus Diseases (Covid-19). Nune'e, amostra husi pasiente ne'e haruka ona ba Austrália hodi halo teste laboratóriu.

Organizasaun Nasoins Unidas liuhusi nia koordenador Organizasaun Mundiál Saúde (OMS) iha Timor-Leste deskonfia pesoal ida moras ho sintoma Covid-19, maibé rezultadu teste seidauk sai. Tanba ne'e, Timor-Leste ofisialmente seidauk identifika Corona Virus.

Reprezentante OMS iha Timor-Leste, Rajesh Pandev informa lia hirak ne'e hafoin remata enkontru ho Prezidente Repúblika, Francisco Guterres Lú Olo, iha Palásiu Prezidensiál, Bairru-Pité, Segunda (9/3). 

"Agora dadauk ita identifika suspeitu. Ema ne'e moras. Ne'e duni, nia amostra ita haruka ona ba Darwin para ema halo teste, kuandu orsida loraik ka aban dadeer rezultadu ne'e mai ami sei informa," dehan nia. 

Enkontru entre Reprezentante ONU no OMS ho Prezidente Repúblika rasik hanesan fahe informasaun relasiona ho moras Covid-19, liuliu buka dalan atu kontrola Virus Corona. Nune'e, Prezidente Repúblika rasik hatete prontu atu kolabora ho entidade hotu hodi kombate Covid-19 iha Timor-Leste. 

Informasaun ne’ebe midia ne’e konsege hetan informa katak suspeitu ne’e orijin husi nasaun Italia no tama iha Hospital Stamford iha Sexta (6/3) lokraik ho temperatura kuaze grau 37 maibe to'o ohin loron suspeitu refere nia grau temperatura tun fali ba 36 no sei hala'o hela observasaun iha Ospital Stamford, Mandarin Dili. 

Dadus ne'ebé www.tempotimor.com asesu, atualizasaun surtu Covid-19 husi OMS to'o loron 27 Fevereiru 2020, globalmente kazu konfirmadu 82.294 (kazu foun 1.185). 

Entretantu, iha Xina (risku tebes) kazu konfirmadu 78.630 (kazu foun 439), mate hamutuk na’in 2.747 (mate foun 29). 

Alende husi li'ur, totál kazu konfirmandu 3.664 (kazu foun 746 ). Alarga ona ba país 48 (país foun 9), na’in 57 mate (mate foun 13).

Husi dadaus ne'e, país sira afetadu maka’as Koreia Súl ho kazu 1.595, Itália 453, Japaun 189, Iraun 139. Pais sira seluk, deteta kazu sei menus husi 100. (*)

Rate this item
(0 votes)
Last modified on Monday, 09 March 2020 18:50
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.