Vise Ministru saúde Bonifácio ‘Maucoli’ dos Reis hateten, planu ida ne'e mak oitavu governu sei lansa bazeia ba realidade, hare ba númeru moras fuan ne'ebé kontinua aumenta iha TL.
"Realidade ida agora, moras ida la hada'et mak agora sa'e, liu-liu moras fuan. Tanba ne'e, mak oitavu governu liu husi ministériu saúde, agora komesa harii ona, fini kurasaun ne'ebé mak ita nia infraestrutra mais preparadu," Maucoli hateten ba www.tempotimor.com iha PN, segunda (9/11).
Kona-ba hari klinika ne'e, nia dehan, daudauk ne’e husi parseiru balun mós haruka ona sira nia proposta ba Ministériu Saúde, no parte tékniku sei halo hela estudu, se karik los ona Ministeriu saúde sei deisidi atu asina kontratu ida ne'e ho parte kompetente, nune’e bele toma responsabilidade kona-ba ekipamentu tomak ne'ebé atu uza ba iha klínika ne'e.
"Agora ami halo hela kontaktu ho IHL malázia, ne'ebé mak responsabiliza ba klinika ida ne'e, preparasaun ba asina memorandu, Sira mós haruka ona sira nia proposta mai. Ami nia tékniku sira agora estuda hela, depois karik los ona, semana oin ka semana ida ne'e ita bele asina ona kontratu atu nune’e, ekipamentu sira ne'e bele lori mai instala ona," nia informa.
Bainhira mak implementa, ida ne'e nia haktuir, sei hein semana ida tan, tanba sei hare hela pontu balun iha proposta ne'ebé haruka husi parseiru sira.
"Ita sei halo diskusaun didi’ak ho diresaun nasionál Hospitalac, ho Hospital Nasionál Guido Valadares, hodi hare, buat ruma ne’ebé presiza aumenta, tanba ita hare katak, sira nia proposta ne'e sira hakarak prolonga durante tinan lima no agora sei iha parte preparasun maibé esensiál liu mak ita hakarak habadak, ninia asaun ne'e, komesa husi 2023 pelo menus sira ne'e bele halo ona iha ne'e. La’ós ita hein fali tan to'o tinan lima mak foin halo asaun, maibé hakarak aperta atu asaun ne'e tenke hahú ona iha 2021, 2022 to'o 2023 ne'e operasaun sira tenke halo iha ne'e," nia dehan.
Nia mós fiar katak, bainhira klinika korasaun ne'e mak estabelese ona iha TL, ida ne'e bele trava ona referénsia dezlokamentu, nune'e bele lori ema mai.
"Duké ita ba gasta osan barak liu, entaun ita lori espesialista sira mai ho sira nia ekipamentu, atu nune'e ema hotu bele asesu la'ós ema boot sira de’it mak hakarak sai ba liur tanb iha osan no iha oportunidade maibé ne'e liuliu ba sidadaun hotu," nia subliña.