"Ida fali ikan lanu ema mate iha Lautém, iha 12 janeiru 2021 oras tuku 13 meodia, akontese ikan lanu ema ne'e iha suku Parlamentu, ema ida mate ne'e ho naran Leonel Fernandes, tinan 9 sira na'in-lima (5) seluk konsege lori ba Ospitál.
Portavóz Komando jerál PNTL, Superintendente Xefi, Arnaldo de Araújo hatete, ikan lanu mate labarik mane ne'e ho nia kolega nain lima selum ne'ebé baixa iha Ospitál, hafoin konsumu ikan ne'ebé sira kaer husi tasi iha área suku Parlamentu nian," Portavós Komandu jerál PNTL, Superintendente Xefe, Arnaldo de Araújo liuhusi konferénsia imprénsa ne'ebé realiza iha Kaikoli, kinta (14/01).
"Sira konsumu ikan ne'ebé maka dala-ruma iha ona venenu ruma iha laran no ida la konsege lori ba ospitál, mate, na'in- lima agora daudaun halo hela tratamentu iha Ospitál", nia katak.
Ho situasaun ne'e, nia lori naran instituisaun PNTL nian, husu ba komunidade sira atu bainhira konsumu ikan, tenke ho kuidadu tanba oras ne'e TL tama ona ba tempu udan, bele afeta buat barak iha ne'ebá, tanba ne'e atu konsumu ikan ho kuidadu.
Entretantu, liuhusi via-telefónika, Komandante PNTL munisípiu Lautém, Superintendente Polísia, António do Rego Fernandes informa, hafoin akontesimentu labarik mane nain tolu mak baixa iha Ospitál Lautém no na'in-rua seluk konsege transporta hodi ba halo tratamentu Saúde iha Ospitál referal Baukau.
"Maibé sira-nia kondisaun oras ne'e di'ak hotu ona, rekupera ona no sira idak-idak fila ona ba uma", informa nia.(*)
