Situasaun Emergensia, Deputadu Haksesuk Proposta Alterasaun Lei Jestaun Finanseira

Parlamentu Nasional ne'ebe vota hodi Xumba jeneralidade OJE 2020 iha loron 17 Janeiru 2020 Parlamentu Nasional ne'ebe vota hodi Xumba jeneralidade OJE 2020 iha loron 17 Janeiru 2020 Foto File

Tempitimor (Dili)-Reprezentante povu iha uma fukun Parlamentu nasional haksesuk malu relasiona ho proposta alterasaun urzensia lei jestaun finanseira, deputadu balun apoiu altera i balun lakohi i propoint levantamento fundu extraordinária.

Timor-Leste dadaun ne'e iha situasaun Emergensia, atu responde ba ameasas Pandemia Covid-19 ne'ebé dadaun iha ona Suspeitu pozitivu ida i inundasaun ka dezastre naturais ne'ebé akontese iha Kapital Dili foin lalais ne'e.

Nune'e Guvernu hatoo Proposta Alterasaun Lei jestaun finanseira ho karakter urjensia atu deputadu iha uma fukun Parlamentu nasional diskuti i altera nune'e loke espasu ba guvernu flexibilidade asesu ba fundu estadu tuir nesidade hodi hatan ba situasaun aktual.

Maibe durante debate, maioria Deputadu sira aprezenta razaun oinoin hodi fundamentu, deputadu balun apoiu alterasaun urzensia ba lei jestaun finanseira i balun konsidera guvernu presiza halo deit levantamento extraordinária ba Parlamentu nasional para utiliza osan fundus petrolífeiru.

Hanesan Deputadu Bankada PLP Abel Pires iha nia intervensaun konsidera situasaun agora emergensia nune'e guvernu presiza flexibilidade utiliza osan estadu hodi responde ba kauza ka situasaun ne'ebé dadaun ne'e Timor-Leste hasoru, nune'e presiza tebes atu altera lei jestaun finanseira ne'ebé guvernu submete mai Parlamentu nasional, nune'e nia husu atu deputadu sira haree lai asuntu povu i tau ketak lai politika iha kotuk.

"agora dadaun ne'e rezime duadesimal ne'e mak kesi tiha guvernu nia kapasidade i abilidade para halo intervensaun ba situasaun sira ne'e para halo mudansa, hau dezafia ita hotu tau lai politik iha kotuk, ita haree lai ita nia povu ne'e, virus ida ne'e iha ita nia vida nungka akontese tamba saida mak ita sibuk fali haree politika," dehan Abel Pires iha Parlamentu nasional Dili,Segunda (23/03).

iha fatin hanesan Xefi bankada Fretilin Aniceito Guterres hatete inportante atu altera lei jestaun finanseira tamba situasaun obriga atu guvernu presiza asesu ba orsamentu estadu.

"Virus atu mai mos ita la preve ona derepenti mai mak hakfodak. ita koalia dehan labele politiza mais ita politiza dadaun," dehan Aniceito.

Nune'e mos Xefi Bankada PD Antonio da Conseição Kalohan konsidera guvernu atual hanesan guvernu demisionariu nune'e laiha kondisaun atu altera lei jestaun finanseira.

"Aktu ida husi Prezidenti Repúblika nian husik hela guvernu ida ne'e hanesan guvernu demisionariu, i tamba guvernu ida ne'ebé demisionariu hau nia hanoin ita presiza haree didiak lai wainhira avansa ona ho mudansa ba lei ida ne'ebé inportante tebes ba regula orsamentu hotu," dehan Kalohan.

Iha Sorin seluk Deputada CNRT Carmelita Moniz konsidera kondisaun dadaun ne'e emergensia maibe lapresiza atu altera lei jestaun finanseira maibe Guvernu Presiza halo proposta extraordinária ba Parlamentu nasional para aorova hodi utilza ba situasaun atual.

"Ita presiza osan mak tenki lalais, tamba ne'e presiza levantamento extraordinária ida husi fundu petrolífeiru hodi responde ba kestaun ne'ebé hasoru dadaun ne'e. Parlamentu nasional iha dever moral atu aprova osan extraordinária para fo ba guvernu i la presiza mai tan ho alterasaun lei hanesan dadaun ne'e," dehan Moniz.

Entertantu wainhira halo debate hela, Ahi eletrisidade iha Parlamentu nasional mos mate Nune'e debate sei kontinua fali ba aban atu votasaun pedudu urzensia ba lei jestaun finanseira.(*) 

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.