Maski nune'e, sidadaun na'in 41 ne'ebé kuarentena iha Hotél Lesidere, ezije atu fila ona ba hamutuk ho sira ninia familia.

Judite Santina Tilman, resepsionista Hotél Lesidere hateten, sidadaun sira ne'e kumpre regra ona kuarentena maibé seidauk sai.

"Horseik sira protesta, entaun sira husi saude mai dehan ohin, entaun sira-nia sasán mós haruka hotu ona, depois xave mós sira entrega hotu no rai hela iha kotuk," dehan nia, iha knaar fatin, Sesta (17/4).

Nia mós dehan, tuir loloos ohin sai, maibé to'o agora parte saúde ida mós seidauk mai.

Entretantu, sidadaun na'in 41 ne'ebé iha kuarentena ne'e liu ona semana rua.

"Sira tama iha ne'e 31 Marsu, loloos ne'e sira sai iha dia 15 Abríl, maibé horseik la jadi, to'o agora mós seidauk," nia dehan.

Entretantu, pesoál seguransa ne'ebé durante ne'e asegura sira iha kuarentena katak, horseik saúde mai katak ohin sai, maibé to'o agora seidauk sai.

"Horseik sira saúde mai katak ohin sai, maibé to'o agora seidauk, ami rona katak kansela, maibé la hatene razaun kansela ne'e saida," dehan pesoal seguransa ne'e.

Sidadaun sira ne'ebé hela iha kuarentena ne'e komponstu husi mane 26, feto 15.

To'o notisia ne'e tuun, seidauk iha konfirmasaun husi ekipa Sentru Integradu ba Jestaun Krize ne'ebé toma responsabilidade ba fatin kuarentena sira.