PN sei “La Husik” Osan Rihun $500 Fila ba Kofre Estadu

Vice-prezidente Parlamentu Nasional Luis Roberto ko'alia ba jornalista sira iha resintu Parlamentu Nasional, kinta (04/06) Vice-prezidente Parlamentu Nasional Luis Roberto ko'alia ba jornalista sira iha resintu Parlamentu Nasional, kinta (04/06) Foto Tempo Timor

Tempotimor (Dili)-Maske molok ne’e mosu kritika kona-ba orsamentu rihun $500 husi fundus Covid-19 ne’ebé aloka ba Parlamentu Nasionál (PN) no iha sujestaun balun husi deputadu PN rasik atu orsamentu refere fila ba kofre estadu, maibé hafoin PN normaliza fila fali, deputadu sira sei la husik osan refere fila ba kofre estadu.

Iha fulan Maiu liu ba, Vise Prezidente PN Luis Roberto fó hanoin atu di’ak liu orsamentu rihun $500 ne’e hatama fali ba kofre estadu.

Iha momentu ne’ebá, deputadu husi Bankada KHUNTO ne’e dehan, osan rihun $500 ne’ebé aloka ba PN atu halo fiskalizasaun ba asuntu Covid-19 seidauk utuliza maske hela semana rua de’it periodu estadu emerjensia daruak remata ona.

"Agora ne'e mós besik tama ona fulan klaran Maiu ninian, ne'ebé di'ak liu osan ida rihun $500 ba PN ne'e di'ak liu tau fila ba kofre estadu, tanba PN la halo nia serbisu.”

Durante estadu emerjénsia, nia hatutan, deputadu sira uza de’it orsamentu duadesimu ba PN hodi halo fiskalizasaun.

"Ha'u hakarak deputadu sira hala'o ninia knaar mak bele uza karik osan (rihun $500) ne'e, mais durante ne'e mak abandona de'it no la halo serbisu, osan ne’e tenke fila ba kofre estadu,” dehan nia.

Maibé hafoin iha mudansa iha kargu Prezidente Komisaun espesializada PN ne’ebé maioria lidera husi deputadu bankada FRETILIN, PLP no KHUNTO, Luis Roberto hato’o fali deklarasaun kontrariu.

Vise Prezidente PN Luis Roberto hatete, orsamentu rihun $ 500 ne'ebe aprova ba Parlamentu Nasional ne'e aloka ona ba kada komisaun atu bele ezekuta.

"Orsamentu $ 500 Mill ne'ebé abrova ba Parlamentu Nasional ne'e horseik ami enkontru ona no haruka fila fali ba kada komisaun ne'ebé hatama sira-nia pareser par bele ezekuta ," dehan Vise Prezidente PN husi bankada KHUNTO ne’e iha PN, Sesta (05/06).

Tuir nia, tanba orsamentu ne’e aprova ba PN, la presiza haruka fila ba kofre estadu, tanba kada komisaun mós iha planu atu ezekuta orsamentu refere.

"Ha’u hanoin Parlamentu Nasional mós bele jere ka ezekuta, tanba fila fali ba kada komisaun mós iha planu atu haree ba surtu Covid-19."

Nia informa, iha Kinta (04/06), Prezidente PN Aniceto Guteres mós fó ona orientasaun ba Prezidente komisaun sira atu ezekuta orsamentu rihun $500 ne'e.

Rate this item
(1 Vote)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.