“Seremónia deslokasaun ne'e hanesan responde ida husi komandu Munisípiu sira, ne'ebé sira sempre hato'o katak ami-nia rekursu la sufisiente para koloka ba sentru votasaun sira, ne'ebé objetivu mak responde nesessidade proposta balun ne'ebé komandante Munisípiu sira hato'o mai atu apoiu tan, nune'e Kuartel jerál rasik inklui unidade sira hotu ne'e ita koloka hotu, nomeia no tau ba iha Munisípiu sira”, dehan Komandante Jerál PNTL, Komisáriu Faustino da Costa, iha Komandu Jerál, Kaikoli, kinta (17/03).

Tanba tinan ida ne'e sentru votasaun aumenta númeru ne'ebé boot ba rihun-ida-atusrua, entaun membru sira ne'e mós presiza aumenta hodi halo seguransa ne'ebé másimu hodi reforsa seguransa iha munisípiu sira.

“Hahú ohin, membru sira ne'e submete direita ba komandante munisípiu ne'ebé sira koloka ba, no Komadante Munisípiu mak sei jere hodi tau sira iha sentru votasaun ne'ebé no iha eskuadra ida ne'ebé, ne'e iha Munisípiu mak sei haree”, esplika nia.

Membru PNTL hirak ne'e nia misaun sei remata iha munisípiu bainhira tribunál rekursu fó sai ona rezultadu finál ba eleisaun Prezidensiál ne’ebé sei hala’o iha loron sábadu (19/03).

“Sira-nia misaun ne'e to’o bainhira rezultadu ne'e aprezenta ona ba CNE nasionál hodi kontinua ba apuramentu nasionál, maske nune'e iha sentru votasaun sira, tantu sede, STAE, autóridade munisípiu, STAE nasionál, CNE nasionál, ita-nia PNTL nafatin asegura, 24 oras to’o rezultadu tribunál rekursu fó sai”, hatete nia.

Nune'e husu ba membru sira serbisu iha terenu nafatin servisu imparsiál, la haree ba kór, rasa, etniku, relijaun nomós klase sosiál ka ekonomia, maibé servisu tuir lei no orden.

Membru sira ne’ebé aloka ba kada munisípiu depende ba nesessidade, munisípiu balun hetan apoiu mais 20, balun 5 no iha balun to’o 40. (*)