Husi númeru ne'e, motorizada 40 polísia prende iha kampaña loron 14 fulan-marsu, enkuantu iha loron 15, prende motorizada hamutuk 112, no iha kampaña ikus husi FRETILIN, KHUNTO no Kandidatura númeru sorteiu 8 Lere Anan Timur, polísia prende motorizada 148, nune'e totál 300.
Komandante PNTL Munisípiu Dili, Superintendente Xefe Henrique da Costa informa, komandu munisípiu Dili hetan apoiu másimu husi Unidade Espesiál Polísia (UEP), Unidade Patrollamentu Fronteira (UPF), Unidade Polísia Maritima (UPM), kuartel Jerál, inklui Sentru Formasaun PNTL hodi garante seguransa ba kampaña kandidatura sira iha munisípiu Dili.
“Mesmu iha militante, no apoiante husi kandidatura sira barak, maibé ita konsege fó seguransa másimu no atividade hotu la'o ho di'ak”, dehan Henrique, iha Kuartel Jerál PNTL, Kaikoli, kinta (17/03).
Maske nune'e, iha operasaun refere ekipa konsege prende motorizada apoiante husi kandidatura prezidente sira tanba viola lei kódiku estrada.
“Ita konsege foti motorizadas hirak ne'ebé mak identifika, uza kanu rasing, balun la uza espelu, la taka kapasete, balun tula ema tolu”, dehan nia.
Motorizada hirak ne'e, dadaun ha hela komandu Munisípiu Dili, bainhira na’in ba selu infrasaun hafoin bele ba aprezenta iha sessaun tránzitu hodi foti filafali evidénsia ne’ebé prende.
“Motorizada hirak ne'e parte tránzitu sei pasa bilete infrasaun ba sira hodi ba selu iha banku, depois lori resivu ba aprezenta ba tránzitu hodi bele foti hikas sira-nian motorizada”, esplika nia.
Enkuantu ba sira ne'e uza kenal pot recing, polísia sei hasai, no husu na’in foti fali kenal pot standar hodi bele monta hikas, nune’e bele foti sira-nian motorizada, inklui espelu, no xapa matrikula.
Nune'e kontinua apela ba motorista sira atu nafatin kumpri lei kódiku estrada, nomós lei sira seluk, tanba ekipa ida ne'e sei kontinua halo pasa ravista atu nune'e motorista sira bele kumprei lei ne'ebé vigor. (*)