Deskonfia Pesoal PNTL Subar Nia Oan ne’ebé Foin Sa’e Sintu iha Atambua

Oan Feto nain rua husi Ulun Bo'ot iha instituisaun PNTL, Mota Ain (19/9)  Oan Feto nain rua husi Ulun Bo'ot iha instituisaun PNTL, Mota Ain (19/9) Foto Tempo Timor

Tempotimor (Dili)-Deskonfia pesoal Polísia Nasionál Timor-Leste (PNTL) feto ida ho inisial FC subar nia oan mane ho inisial AV ho idade tinan 22 ne’ebé foin fila husi Atambua, Indonezia.

Pesoal PNTL nia oan mane ne’e nu’udar membru organizasaun Persaudaraan Setia Hati Terate (PSHT) ne’ebé tama illegal hafoin ba sa’e sintu iha Atambua.

Maske tama no sai illegal, maibé pesoal PNTL ne’e lakohi koopera ho governu hodi entrega nia oan kumpre kuarentena ne’ebé sai nu’udar regra obrigatoriu ba sidadaun sira ne’ebé foin fila husi rai li’ur.

Tuir fontes www.tempotimor.com ne’ebé hala’o knar iha instituisaun seguransa ne’e katak, pesoal PNTL koko subar nia oan AV maske hatene katak nia oan foin fila husi Atambua.

Maske subar, fonte ne’e dehan, ikus mai komando PNTL hatuun orden hodi halo kapturasaun no iha 18 Setembru 2020 konsege kaptura.

“Asistente xefe ne’e naran FC, nia oan ba sa’e sintu mai nia hanesan membru PNTL subar nia oan naran AV, hela fatin iha Perumnas. Idade 22 anos,” informa fonte ne’e.

Hafoin kaptura, PNTL lori kedan pesoal PNTL nia oan mane ne’e ba kuarentena otel Fortuna.

Tuir fonte ne’e, iha pesoal PNTL barak mak sira-nia oan ba sa’e sintu iha Atambua no bainhira fila mai sira la intrega ba parte saúde atu hatama iha kuarentena, maibé sira mak subar fali.

"Polisia barak nia oan sei subar,” dehan nia.

Aleinde ne’e, nia hatete, iha semana ikus foin lalais, autoridade seguransa mós kaptura membru PSHT na’in 6 iha Memo no Mota Ain.

Entre ema na’in 6 ne’e, iha mós ona feto na’in rua husi pesoal PNTL ne’ebé kaer kargu importante iha investigasaun nasional ho inisial AV.

"Sim, aman PNTL, investigasaun nasional nia boot," dehan fonte ne’e.

AV nia oan feto na'in rua, ida ho inisial JsV ho data moris 7 Jullu 1999, no ida seluk ho inisial JnV ho data moris 18 Juñu 2001.

Tuir fonte ne’e, pesoal PNTL ne’e nia oan-feto na’in rua ne’e husi Dili ba sa'e sabuk iha Atambua no tama illegal iha 18 Setembru 2020.

Entretantu, relasiona ho informasaun ne’e, Komandante Unidade Patrulamentu Fronteira (UPF)

Sanco Pires dehan, nia mós rona katak entre Timor-oan sira ne’ebé ba sa'e sabuk iha Atambua, iha mós pesoal PNTL balun nia oan

“Ami mós rona katak ema hirak ne'ebé ba sa'e sabuk ne'e nia inan no aman balun membru PNTL, ne'e loos ou lae? Dala-ruma hanesan ne'e duni maluk," dehan nia.

Maske nune’e, nia hatete, autoridade seguransa sira nafatin asegura fronteira hodi kaptura ema sira ne’ebé tama la liu husi dalan legal.

Rate this item
(2 votes)
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.