"Ita la autoriza komunidade ou na’in ba loja sira atu fa’an fugetis iha loja, tanba hodibainrua, enkontru ho ofisiál superior husi komandu munisípiu no unidade sira, hodi haree situasaun ne'ebé dadaun iha rai laran, no orientasaun husi Komadante jerál mak oinsá haree kona-ba fugetis ne'ebé dadaun ne'e komesa lian ona iha Dili laran”, dehan Komadante PNTL Munisípiu Dili, Superintendente Henrique da Costa, iha komandu munisípiu Dili, kinta (18/11).
Hafoin simu orientasaun husi Komandante Jerál, orienta kedas ba Komadante eskuadra no Xefe seksaun sira hodi hahú atividade halo passa revista ba loja sira ne'ebé mak fa’an fugetis, no sei nafatin passa revista.
Tanba ne’e, informa nafatin ba loja na’in sira, PNTL la autoriza atu fa’an fugetis, balun hatama liu ona, no dadaun ne'e iha ona loja, husu atu rai de'it no labele distribui ba komunidade sira.
"Ida ne'e mós la'ós husi komandu munisípiu Dili de'it, maibé ita hatene katak sasán sira ne'e mós balun hatama husi fronteira mai ona, ita-nia UPF nomós unidade espesial da polísia, e komandu munisípiu Covalima, Bobonaru, e Likisá sira mós halo passa revista no semana hirak liu ba, hetan sasán balun liga ba fugetis no ita-nia UPF sira kaptura ona”, dehan nia.
Medida rigurozu ne'ebé PNTL sira sei uza hodi hasoru loja balun ne'ebé nafatin fa’an fugetis mak, sei hasai ka foti hotu sasán ne'ebé sira fa’an. (*)