“Sim, ita-nia ekipa forsa rezerva hamutuk ema na’in-25 ne’ebé mak hala’o sira-nia treinamentu uza forsa ninian, hahú loron tolu ba kotuk, ohin ne'e sei remata no treinamentu ne'e ninia objetivu oinsá sira bele implementa iha terenu ho di'ak”, dehan Komandante PNTL Munisípiu Dili, Superintendente Xef Henrique da Costa, iha Komandu Munisípiu Dili, Kaikoli, kuarta (26/01).

Treinamentu ne'e mós la'ós para de'it iha ne'e, maibé iha fulan-fevereiru sei identifika tan membru sira seluk husi eskuadra sira iha munisipiu Dili, atubele partisipa treinamentu uza forsa nian.

“Ita-nia hanoin depois re-treinamentu ne'e remata ita sei halo fali treinamentu konjunta ida, nune'e sira bele iha uniformiza ba terenu”, hatete nia.

Aleinde ne'e, membru sira mós sei haree filafali ba lei uza forsa nian, primeiru uza sira-nia lian no uza forsa tuir estandar ne’ebé mak iha katak kilat ne'e ultima rekursu ida ne’ebé PNTL uza.

Tanba ne'e membru sira sei nafatin treinu mós kona-ba uza gas, nomós sei fó treinamentu uza armas nian, ba pistola, atu sira halo atuasaun ruma tuir regra ne’ebé iha.

Nune'e nafatin husu ba membru sira, importante tebes mak komunikasaun  iha terenu, no ida ne'e tenke di'ak nakonu ho étika no moral, labele hasai liafuan ne’ebé la merese hasai ba públiku ka iha terenu wainhira halo atuasaun ruma.

“Sim ida ne'e mós dala barak iha treinamentu ne'e sempre fó sai liliu iha liña komunikasaun ne'e, tanba ne'e fofoun ne'e presiza ita-nia komunikasaun ho ema sira ne’ebé hanesan vítima ka suspeitu, ne'e mós orden ida. Nune'e bele hadi’a komunikasaun iha terenu tantu se-se de’it mak ita hasoru ne’e, tenke uza linguajem etika no moral”, haktenik nia. (*)