Diretór Interinu FM, Sancho Xavier hatete, atividade negósiu Ilegál iha fronteira la’ós buat foun, maibé ida ne’e akontese bebeik ona, tanba ne’e Governu presiza kria merkadu livre hodi bele fasilita sidadaun sira halo negósiu.

“Ha’u hanoin ida ne’e importante Governu presiza haree ona asuntu fronteira, la’ós atu responde ba de’it iha seguransa, maibé tau mós atensaun ba ekonomia, asuntu Sosiál no kulturál, tanba sidadaun sira iha fronteira hakat ba mai halo relasaun familiar mak barak, no durante ne’e akontese movimentu ilegál iha fronteira barak tanba nesesidade”, dehan Sancho iha nia kna’ar fatin, Bairopite Sentrál, kinta (27/01).

Aleinde ne'e atu evita sidadaun sira halo movimentu no halo negósiu ilegál ne'e mós, tenke reforsa seguransa iha fronteira terestere hanesan Unidade Polísia Fronteira (UPF), Polísia Nasional Timor-Leste (PNTL) no Servisu Migrasaun iha fronteira.

“Durante ne’e ita hotu akompaña ita-nia autoridade seguransa sira iha fronteira hasoru difikuldade barak, tanba ho fronteira ida ne’ebé mak luan no kondisaun ba UPF atu hela mós la di’ak inklui rekursu limitadu ida ne’e difísil ba sira atu halo kontrulu ba fronteira”, hatete nia. 

Tanba ne'e sidadaun sira hatama sasán hanesan sigaru, agora sai kestaun ida ba públiku, tanba Governu hahú hasae taxa importasaun sigaru, nune’e komersiante sira iha merkadu komesa hasae mós folin sigaru maka’as.

“Durante ne’e ema barak la preokupa ho saúde. Ha’u hanoin ida ne’e di’ak, maibé problema mak iha fronteira bainhira sasán folin sa’e ema komesa uza dalan ilegál hodi hatama sasán”, esplika nia.

Tanba ne’e, Governu tenke tau importante liu iha fornteira hodi apoiu kondisaun ho rekursu sira ba UPF atu halo  kontrolu ida di’ak iha liña fronteira atu evita sidadaun sira hatama sasán ho dalan ilegál. (*)