Portavóz Komandu Jerál Polísia Nasional Timor-Leste (PNTL), Superintendente Xefi, Arnaldo de Araújo dehan, abitante na’in-11 ne'e kompostu pasajeiru sira, ajudante no motorísta ne’ebé halo kontatu direta ho pasiente Covid-19 durante halo viájen husi munisípiu Bobonaru ba Suku Lourba, Postu administrativu Bobonaru nian.
Sidadaun hirak ne’e PNTL ba foti iha sira nia uma iha loron Domingu (14/02) hodi halo kedas teste swab ho rezultadu negativu.
Molok tama mai Timor-Leste, sidadaun na'in 11 ne'e halo ona kontatu direta ho timoroan ida ne’ebé hakat ilegál husi Atambua Indonézia liu-husi fronteira Tunubibi hodi sa’e motór ojek ba Maliana no sa’e fali Angguna viájen ba liu Suku Lourba iha loron 11 Fevereiru 2021.
“Ema sira ne’ebé sa'e kareta hamutuk ho pasiente Covid-19 ne’ebé mai husi Atambua, ita-nia PNTL Bobonaru no Ministériu Saúde (MS) ba foti ona sira hodi lori ona ba kuarentina Batugade,” dehan Portavóz, Arnaldo de Araújo iha Komandu Jerál PNTL Kaikoli, tersa (16/02/21).
Nia dehan, abitante ida ne’ebé tama ilegál no pozitivu Covid-19 ne'e, bainhira rekopera tiha, PNTL sei detein nia hodi halo prosesu investigasaun.
Nune'e mos, Koordenadora Jerál Komisaun Covid-19, Odete da Silva Viegas dehan, abitante na’in 11 ne’e parte Pilar III Covid-19 halo ona teste swab ba sira.
“Abitante na’in-11 ne’e horiseik (Domingu 15/02) responsável Pilár III informa katak, ema na’in-hitu ita foti ona sira nia sampel no ema na’in-lima inklui kondutór ho ajudante ita asegura hotu ona sira no ohin foti ona swab sira nia rezultadu hatudu negativu, entaun ita nia povu sira bele hakmatek nafatin kumpri regras,” Nia haktuir
Tuir regra Ministériu Saude, abitante hirak ne’e sei kontinua submete iha kuarentena to'o loron 14 remata sei prolonga sira hetan iha kuaretena to'o loron 10 remata sei halo teste swab maka la deskobre sira moras bele fila ba uma.(*)