“Tanba iha eleisaun Primeira Volta jornalista sira hatudu ona sira-nia imparsialidade neutralidade iha kobertura no la hamosu influénsia poder polítika no ekonómiku”, dehan Expedito iha Sentru Votasaun Faról, tersa (19/04).
Tanba ne'e, KI husu atu kontinua promove imparsialidade nune'e sidadaun sira kontinua fiar órgaun komunikasaun hanesan mediadór informatór ne'ebé di'ak.
Ba parte KI sei fó hanoin nafatin ba órgaun komunikasaun sosiál atu kaer metin kódigu etika jornalizmu iha eleisaun prezidensiál iha tinan 2022.
“Konsellu Imprensa sempre fó hanoin ba órgaun komunikasaun sosiál hotu liuhusi matan dalan reportajen ba jornalista sira ne'e mak Konsellu Imprensa fó sai ona, katak kaer metin nafatin kódigu etika jornalizmu nian maske iha grupu balun hakarak atu lori jornalista sira ba tendénsia interese balun mais Konsellu Imprensa fiar katak, jornalista sira sei firme nafatin no kaer metin kode etika ho polítika redasaun ne'ebé ida-idak nia fó sai”, afirma nia.
Nune'e públiku bele hetan informasaun ne'ebé iha balansu kredível la'ós informasaun ne'ebé kria instabilidade, tanba ne'e Konsellu Imprensa fiar katak, notísia ne'ebé fó sai husi jornalista sira husi órgaun komunikasaun sosiál hotu sei nafatin bazeia ba kódigu etika. (*)