Tanba durante implementasaun programa merenda eskolar faze dahuluk iha Munisípiu Baukau mosu lakunas barak, tanba falla iha ékipamentu tein nian inklui halais dokumentu eletronika atu prosesa relatóriu implementasaun programa merenda eskolar iha kada eskola.
“Implementasaun iha lakunas barak, falta ba matérial tein nian, bikan kanuru laiha ona, tanba distribuisaun tinan-10 ona, entaun eskola husu alunu lori ida-idak nia bikan kanuru, segundu difikuldade sanan tasu hodi tein barak mak kuak ona, tanba utiliza husi inisiu implementa nian, terseiru difikuldade dapur, fatin balun difikuldade bee-moos, pasiénsia Estudante dader lori bee, orsamentu mós ki'ik $0.25 kada alunu”, deklara Diretór Servisu Edukasaun Munisípiu Baukau, Augusto Ornai Ximenes iha kna'ar fatin, sesta (12/08).
Nune’e laiha posibilidade eskola iha área urbanu laiha osan atu selu pulsa eletrisidade hodi tein, sosa ai-sunu, tenke husu estudante lori ai-sunu, difikuldade seluk mak diretiva eskola sira-nian halo relatóriu, orsamentu $0.25, halo relatóriu liga ho suratahan, komputadór prínter, tanba kompudór sira simu iha 2011 liuba agora barak mak avaria ona difikulta relatóriu.
Preukupasaun ne'e Servisu Edukasaun Munisípiu Baukau inkliña ona iha planu 2023 ba orsamentu kapitál menor hodi rezolve, maibé depende ba orsamentu husi nasionál ne'ebé haruka ba Autoridade Munisípal.
Tanba ne'e, parseiru dezenvolvimentu hanesan WFP ho KOICA halo ona Estudu tereñu atu halo konstrusaun dapur no armazenentu iha eskola 150 ba programa merenda eskolar.
Entretantu orsamentu ba programa merenda eskola, edukasaun Baukau ezekuta ona loron 35 ba faze dahuluk, no faze daruak loron 35 nian dadaun la'o hela tuir planu sei remata iha fulan-setembru tinan-2022, tanba orsamentu ba programa refere Prezidente Autoridade Munisípal aloka la tuir loron efetivu kalendáriu nian.
“Kalendáriu efetivu ba merenda eskolar nian 190 dias, maibé orsamentu ne'ebé aprova mai Autoridade Munisípal atubele fó ba eskola sira fó hán labarik sira ne'e 70 dias de'it tuir posibilidade orsamentu, 35 dias hotu ona iha ona prosesu relatóriu, faze daruak 35 dias iha hela faze exekusaun setembru hotu ona”, hatete nia.
Ba orsamentu programa merenda eskolar kada loron servisu edukasaun Baukau ezekuta pur-volta $8.000. (*)