"Baukau sai área prioridade ba Uma kreda Katólika Australia nian, organizasaun ba dezenvolvimentu umanitáriu liuliu iha Timor-Leste", dehan Reprezentante Programa Caritas Australia iha Timor-Leste Fernando Pirez, iha salaun FUP Baukau, Tersa (03/01).
Uma Kréda Australia liuhusi organizasaun Caritas kada tinan apoiu orsamentu US$35.000 kompostu husi osan regular no adisionál ba FUP Baukau hodi aloka ba funsionamentu servisu nian hanesan programa protesaun liuhusi sosializasaun ba komunidade sira atu hatene halo prevensaun violénsia bazeia ba jenéru foka liu ba mane.
"Saida mak mane sira bele halo ba feto, para bele hatene saida mak domin, respeitu, entermus de joven sira so'e bebe , isin rua sedu, oinsa ita bele fó imformasaun ba joven sira, mais orsamentu ne'ebé fó ba programa rua, ba protesaun nian no ba agrikultura nian", nia afirma
Diretóra Uma Paz Baukau, Felismena Belo, sente kontente ho vizitasaun husi Most Reverend Auxiliary Bispo husi Sydnei Richard Umbers, no Céo Caritas Australia nian iha Timor-Leste, tanba bele haree direita progresu servisu ne'ebé durante apoiu orsamentu inisiu tinan 2009 to'o ohin loron.
Husi orsamentu ne'ebé uma kreda australia liuhusi organizasaun caritas apoiu ba FUP Baukau, aloka ba funsionamentu servisu nian, programa rekopera ekonómia vitíma nian, hanesan fó osan hodi loke negósiu inklui halo uma ba vitíma ne'ebé laiha uma.
"Primeiru ami ko'alia kona-ba servisu Uma Paz Baukau ho Australia, liuliu uma kréda Australia nian, nune'e atu hametin tán relasaun servisu ba futuru nian, liuliu mós kona-ba atendementu vitíma nian", nia dehan.
Liuhusi vizitasaun FUP Baukau nafatin husu apoiu servisu ba Uma Kréda Australia atu tau matan ba vitíma inan feto sira ne'ebé hetan violénsia hamahan iha FUP Baukau, tanba vitíma sira presiza hetan atendementu.
Alende husi vizita haree progresu servisu, Most Reverend Auxiliary Bispo husi Sydnei Richard Umbers mós fó bensaun ba vitíma sira iha Uma Paz. (*)