"PKRIE ita iha ona 75 pursentu, 25 pursentu mak sei iha difikuldades hela, husi 29 projeitus ne'ebé ita iha, 17 mak atu inagura ona, balun atinji 50 pursentu, eskola ida rua mak seidauk atinji, tanba hahú tarde", dehan Diretór Servisu Edukasaun Munisípal Baukau, Augusto Ornai Ximenes iha salaun apuramentu, Segunda (16/01).
Eskola ne'ebé prosesu konstrusaun no reabilitasaun tarde mak, Lalabu Postu Laga, Ossoufulari no Bailari Postu Baguia, inklui Uadaboru Postu Kelikai, tanba difikulta husi iklima no kodisaun estrada ne’ebé aat.
"Kondisaun iklima, entaun balun seidauk to'o 50 pursentu, hanesan Uadaboru la asesu karreta, entaun sasan sira tenke lalin, ida ne'e difikulta sira nia atinjimentu la sa'e", nia informa
Enkuantu orsamentu ba PKREI 29 iha Baukau, husi kategoria tranférensia públiku Orsamentu Jerál Estadu tinan 2021 ne'ebé MEJD aloka hamutuk milaun US$3-resin, nune'e iha fulan-fevreiru tinan-2022 servisu edukasaun Munisípal aloka ba kada eskola halo konstrusaun no reabilitasaun ba edifisiu eskola nian ba sala da aula, laboratóriu inklui sanitasaun. (*)