Total kandidatu ne’ebé kompete iha votasaun ne’e hamutuk ema na’in rua, ida maka Reitor sesante, Aurelio Guteres no kandidatu ida seluk maka, Francisco Manuel Martins.
Prosesu votasaun hili Reitor foun UNTL ba periodu 2016-2020 ne’ebé hala’o iha salaun inkontru arquivo da rejistensia partisipa husi membru konselu jeral hamutuk ema na’in 12 maka iha direitu votu.
Rejutadu votasaun iha momentu ne’e hatudu katak, membru konselu jeral na’in 10 maka vota ba Francisco Manuel Martins no na’in 2 maka vota ba Aurelio, tan ne’e Francisco maka ofisialmente asumi kargu nu’udar reitor foun UNTL.
Hafoin eleitu, Francisco haktuir ba Online Tempo Timor katak, programa prioridade hamutuk sanulun resin lima (15) ne’ebé maka importante tebes atu implementa durante ninia mandatu, hodi nune’e bele reforsa kualidade institusional UNTL.
“husi programa hirak ne’ebe ohin ha’u temi maka hanesan, planeamentu jestaun institusional, konstrusaun ajenda akademika, asistensia estudantil, peskiza kriasaun no inovasaun, politika de kualifikasaun graduasaun de serbisu, sustentabilidade no institusionalizasaun do planeamentu komunikasaun meuambiente no plantasaun de agua saniamentu institusional.” dehan Francisco iha ninia intervista ho Jornalista Online Tempo Timor.
Aliende ida ne’e iha mos programa seluk maka hanesan, institusionalizasaun implementasaun da sistema internal administrasaun finansas, kriasaun de novas unidades organika naun interna, organizasaun akademika da administrative kooperasaun nasional no internasional.
Francisco haktuir, programa prioridade hirak ne’e maka sei impementa iha prosesu dezenvolvimentu institusional UNTL ne’ebé eziste nu’udar instituisiona publika do estadu, institusional formadora iha responsabilidade moral etiku no politiku hodi fo formasaun ida ne’ebe adekuadu no kuaidade ba ida ne’e.
“UNTL nu’udar instituisaun publika, ne’e duni iha orsamentu ne’ebe preve ona iha orsamentu jeral do estadu. Mesmu nune’e, bazeia ba ha’u nia aprezentasaun ohin katak, UNTL labele depedente de’it ba orsamentu do estadu maibe oinsá bele buka ona fundus rasik hodi sustenta nesesidade Universidade nian.” Francisco hakotu (**)