"Agradese ba Oitavu governu tanba iha situasaun ida ne'ebé difísil tebetebes no moris ho situasaun orsamentu duodesimu ne'ebé la permite atu halo konstrusaun boot, maibé ho grasa Maromak nia no esforsu maka’as mós husi Ministériu Ensinu Superior hodi tau ideia no rekursu hamutuk e ohin ita inaugura fatin ida ne'ebé furak tebes ho kualidade ida exelente iha sékulu 21 nia”, dehan João Martins bainhira inaugura edifísiu foun Fakuldade Medisina, iha kaikoli, tersa (06/07).
Nune'e mós husu ba estudante UNTL liliu fakuldade Medisina e siénsia saúde hodi bele utiliza fatin infraestrutura edifísiu ne'e ho di'ak ho produtu ne'ebé produtivu
"Ho salas modernas mais confortavel, husu ba profesór no estudante sira bele estuda ho di'ak no bele produtivu liután intermus de rezultadu ensinu peskiza nia, la'ós ita hetan tiha fatin di'ak ita la sai produtu ne'ebé produtivu”, dehan nia.
Iha fatin hanesan nain ba kompaña Linier 8 Algis Eng UNIP.LDA, Agostinho Alves, agradese tanba bele iha konfiansa ba sira hodi konstrui edifísiu ne'e.
Nune'e prosesu konstrusaun ne'e hahú kedan iha fulan-novembru tinan 2019 maibé tanba pandemia Covid-19 entaun hapara tiha iha fulan-Dezembru.
"Prosesu konstrusaun ne’e ami hahú iha novembru 2019, maibé para tiha iha dezembru tanba pandemia covid19, nune'e ami hahú fali iha fevereiru 2020, no ami finaliza iha loron 4 junu 2021”, dehan nia.
Edifísiu foun ne'e iha sala hamutuk sanolu-resin-ualu (18) inklui haris fatin.
Entretantu orsamentu ba alokasaun edifísiu foun UNTL ba Fakuldade medisina no siénsia saúde hamutuk US$678,572,97. (*)