Diretór eskola ensiñu báziku sentral (EBC) Laisorulai kelikai, Venancio Cabral hatete, eskola ensiñu báziku sentral (EBC) Laisorulai kompostu husi ensiñu báziku filial 7 mak hanesan, EBF Abuliri, EBF Darla, EBF Uaimatale, EBF Daemena, EBF Uaida, EBF Samarogo, inkliu EBF Sarbata.
"Ida aat liu ne'e Daemena ho Sarbata, hamutuk ne'e 4, maibé abuliri ho darla iha ona faze konstrusaun, osan iha ona, maibé seidauk iha lansamentu primeiru ne'e mak osan ami seidauk foti," dehan venancio iha salaun enkontru edukasaun Baukau, tersa (11/01).
Eskola rua atu implementa konstrusaun foun ne’e, hetan fundus husi Programa Konstrusaun no Rehabilitasaun Infrastrutura Edukativa (PKRIE) ne’ebé kompostu husi projetu 30 iha Munisípiu Baukau.
Maske eskola rua atu konstrui edifísiu foun iha tempu badak nia laran, maibé eskola rua seluk nia estudante kontinua hasoru problema ba sala aula, tanba kondisaun lapermite bainhira hala’o prosesu aprendisajem.
"Eskola rua kondisaun aat ne'e, hanesan lantai sira ne'e ladi'ak hotu, kakuluk sira ne'e mós anin sobu, kalen sira kuak hotu, maibé iha orsamentu eskolar ami sosa kalen oituan-oituan hodi taka," nia afirma
Maske nune'e, iha tempu udan sei fó difikulta ba prosesu aprendisajem estudante nian iha tempu udan, tanba sala balun kakuluk ladi'ak.
Entertantu, estudante husi treseiru siklu daemena setimu anu to'o nonu anu iha tinan 2021 hamutuk na'in-161 no profesores na'in-5 ne’ebé kompostu husi kontratadu na'in-3, permanente na'in-2 inklui profesores tempu parsiál balun.
Enkuatu, iha tinan 20221 estudantes husi EBF sarbara ne’ebé husi primeiru anu to'o sestu anu hamutuk na'in-140, profesores permanente na'in-5, kontratadu na'in-ida, inklui tempu parsiál na'in-2. (*)
