Lansamentu sesta bázika ne'ebé hala'o husi SEKoop rasik tama ona ba faze da-lima, prímeiru iha munisípiu Kovalima, Likísa, Lospalos, Vikeke, no daudaun lansa iha Manatutu no sei falta munisípiu Aileu ho Ainaro.
Xefi Suku Lakumesak, Filomeno Rodriguês Pereira Cárceres hateten, programa sesta bázika nu'udár programa nasionál ne'ebé governu halo hodi rekopera ekonomia povu durante infrenta situasaun surtu Covid-19 iha TL.
Nia dehan, totál benefisiáriu iha suku Lakumesak ne'ebé simu aihan husi governu hamutuk 2.933 kompostu husi mane 1.488 no feto hamutuk ema nain 1.445.
"Jerálmente benefisiáriu hamutuk 2.933 mak sei simu ai-han Sesta Bázika Husi Governu", Xefi Suku Lakumesak, Filomeno Rodriguês Pereira Cárceres hateten iha sede suku Lakumesak, Kinta (10/12).
Nia informa, suku Lakumesak kompostu husi aldeia lima mak hanesan, Labubu, Hatukonan, Readodok, Tahagamu no Nakaleu.
Totál populasaun iha suku Lakumesak hamutuk 2.921, husi númeru ne'e maiória komunidade moris ho vida agrikultura.
Tuir observasaun www.tempotimor.com iha terrenu nota katak, komunidade sira preparadu hodi hein prosesu distribuisaun ai-han sesta bázika ba sira hodi bele rekopera fila-fali sira nia ekonómia família nian.
Tuir oráriu ne'ebé iha, ekipa sei distribui ai-han sesta bázika ba komunidade iha suku Lakumesak durante semana ida.(*)