“Agora dadauk ami iha UNTL iha fakuldade Ekonomia ne'e hakarak oinsá mak atu estabelese kooperativa, tanba ida ne'e mak kuaze iha fulan haat nia laran iha koordenasaun husi fakuldade rasik, tanba ida ne'e mak ha'u mai halo introdusaun badak iha ne'e, hatete katak kooperativa ne'e la fásil”, dehan Diretór Reinaldo ba www.tempotimor.com iha Kampus Fakuldade Ekonómia, tersa (08/02).
Tanba atu estabelese kooperativa ida ne'e iha problema ne'ebé seriu la halimar, tanba nia jestaun ne'e la fasil ho atividade sira seluk.
"Ohin enkoraza ona estudante no dosente sira hakarak hari’i kooperativa ita-boot sira tenke iha komitmentu boot, hodi nune'e kooperativa ne'e bele la'o”, afirma nia.
Formasaun ne'ebé SEKOOP fó ba membru Kooperativa Brilla Akadémika ne'e durante loron haat foka ba vantajen no dezvantajen, nia benefisiáriu sira, direitu devere membru sira nian, regra sira, inklui lei sira, hodi nune'e membru sira la'o tuir orientasaun ne'ebé mak hetan ona husi SEKOOP.
Entretantu Vise Reitora Assuntu Estudantil, Ligia Tomas Correia hatete, iha inisiativa hari’i kooperativa Brilla Akadémika ne'e tanba iha akadémika sira-nia leet, no intensaun seluk mak fó kampu servisu ba estudante sira ne'ebé termina no estudu iha fakuldade Ekonomia ne'e rasik.
“Entaun provizoriamente ami hanoin atu hari’i ne'e naran Kooperativa Brilla Akadémika, ho intensaun Akadémika ne'ebé ami haree hatúr nia naran ne'e tanba ami hala'o iha Akadémika sira, maibé la taka dalan mós ba ema sira ne'ebé la'ós akadémika hakarak hola parte iha kooperativa ne'e”, dehan nia.
Prinsípiu husi Kooperativa Brilla Akadémika ne'e, sei foku ba kooperativa multisetorál tanba sei iha atividade sira ne'ebé mak fakuldade ekonomia rasik hala'o ikus mai mak hakarak envolve mós Kréditu Uniaun (CU).
Estudante no dosente sira ne'ebé mak tuir formasaun husi Sekretáriu Estadu Kooperativa liuliu membru Kooperativa foun Brilla Akadémika hamutuk ema na’in-35 ne’ebé partisipa durante loron haat. (*)