“Ha’u hatete tanba ha’u hakat liu iha horisehik (20/02), tenke hakur mota ke mota tama to'o hirus matan, ne'e hanesan moe boot ida hanesan reprezentante povu”, dehan nia iha plenária PN, segunda (21/02).
Maske Suku Maununo nu’udar fatin istoriku ne'ebé koiñesidu ho Maubere Nunka Nonok (MAU-NUNO) no suku ne’e rasik, líder barak mak ba ne'eba ona, inklui Prezidente Repúblika anteriór, no promete hela atu kria ponte iha Mota Mau-Liak, maibé realidade to'o agora ponte ne'e rasik seidauk hari’i.
“Suku ida Mau-Nuno ha’u temi dehan Maubere Nunka Nonok, ohin ha'u reprezenta sira atu ko'alia iha ne'e, Mota ne'e dehan Mau-Liak, Governu buka tenta tok”, dehan Bianco.
Tanba Suku Mau-Nuno iha tempu okupasaun Indonézia ne'e sai hanesan fatin ba baze apoiu, bainhira rahun suku refere sai fuik, nune'e iha fali tinan 1989 no 1990 mak ema ba hela fali.
Iha tempu situasaun difísil, ema halo ponte tenta atu halo hotu, maibé ho situasaun ne'ebé iha entaun husik hela ponte ida de'it mak to'o ohin loron seidauk halo.
“Ne'ebè sé situasaun ida uluk difísil povu ne'e sofre, e iha 23 setembru mós iha akontesimentu maskre boot, mate barak. Sé iha Indonézia ema halo ponte tolu atu tama, tanba sa mak tinan 20 depois de restaurasaun povu sei halerik”, hatete nia.
Tanba ne'e, fó hanoin hela ba Governu daualu ida ne'e, se bele buka atu rezolve tok situasaun ida ne'e molok termina sira-nia mandatu iha tinan 2023. (*)