“Projetu Dekretu-lei ida-ne’e nian sai ona hanesan objetu deliberasaun iha sorumutuk Konsellu Ministrus iha loron 8 fulan-juñu tinan 2022, maibé, tanba desizaun hodi altera artigu 46, kona-ba data ne’ebé tama ba vigór diploma nian, presiza submete projetu Dekretu-lei ida-ne’e nian ba deliberasaun foun”, dehan Ministru Prezidénsia Konsellu Ministru (MPKM), Fidelis Leite Magalhães iha Palásiu Governu, kuarta (17/08).
Nune’e sei define katak diploma tama iha vigór iha loron 01 fulan-novembru tinan 2022, uluk define katak diploma ne’e sei tama iha vigór iha loron 120 hafoin ninia publikasaun.
Entretantu lejizlasaun kódigu rejistu prediál ho kódigu kadastru sei sai nu’udar mekanizmu atu emite sertifikadu na’in ba rai ba sidadaun sira.
Daudaun ne’e iha dadus kadastrál hosi rezultadu Servisu Nasionál Kadastru (SNC) ne’ebé halo ona rejistu númeru parsela rai hamutuk 318.000 maibé iha parsela rai 42,000 mak sei iha disputa nia-laran.
“Ita tun ba terrenu hodi halo konfirma filafali keta iha mudansa laiha buat ida bele emite ka fó daudaun sertifikadu na’in ba rai no sira ne’ebé sei iha disputa komisaun terras ne’ebé ita sei hari’i buka bele rezolve”, dehan nia. (*)