Tanba Juven sira iha Aldeia Kulau, Suku Bekora, Postu Administrativu Kristu Rei, Munisípiu Dili, ne’ebé halerik kampu servisu ba Kandidatu Prezidente Repúblika, bainhira halo diálogu ho komunidade iha aldeia refere, iha loron kinta (24/02).
“Ha’u hahú ko’alia ho Governu Japaun no Alemaña atu simu ita-nia joven sira tenke ba servisu iha ne’ebá, lalika moe, ita-boot sira servisu iha ne’ebé servisu simu osan di’ak bele hadi’a imi vida no familía”, dehan Horta hafoin hala’o diálogu Komuinitária ho komunidade Aldeia Kulau, Suku Bekora, kinta (24/02).
Ho ida ne'e husu ba joven sira tenke mantein kalma ho paz hodi evita konflitu labele kontinua akontese iha Bairu laran, nune’e fó tempu ba Governu rezolve problema nasaun no buka koordena ho nasaun parseiru sira simu joven Timoroan.
Maske durante ne'e Governu Korea Súl no Portugál fasilita ona Timoroan barak ba servisu iha Inglaterra. Maibé ida ne'e labele moe, tanba uluk Portugál nia sidadaun mós ba servisu iha rai liur hafoin dezenvolve sira-nian rain.
Ba situasaun iha rai laran, sei koordena ho Governu Timor-Leste oinsá mak buka hadi'a kapitál Dili, tenke organiza didi’ak atu regula uma labele halo arbiru, maibé tenke iha distansiamentu hodi evita uma labele halo rabat malu.
Reprezentante Juventude Feto Kulau, Luciana Pereira hatete, nu’udar juventude durante ne'e presiza liu mak kampu traballu atubele hadi'a sira-nia moris.
“Ami juventude Kamea presiza liu mak kria kampu servisu, tanba durante tinan barak joven sei moris dezempregu, tanba laiha kampu servisu”, dehan nia hafoin partisipa diálogu ho Kandidatu Prezidente Repúblika (PR) Horta. (*)