“Ha'u hakarak halo klarifikasaun oituan de'it kona-ba sirkunstánsia horisehik kona-ba vizita kortezia ida ke surpreza ida husi husi Doutor Marí nian ba Jenerál Reformadu Lere nian iha Faról, ne'e sai tiha fali konfuzaun iha públiku hatete katak señór Jenerál taka odamatan nomós lakohi simu, ne'e la'ós kondisaun real”, dehan Favio iha Sede Nasionál Lere Anan Timur, Praia dos Coqueirus, tersa (22/03).
Tuir kronolojia ne'ebé akontese iha loron segunda (21/03), Sekretáriu Jerál Partidu FRETILIN, Marí Alkatiri hakarak halo vizita kortezia ho Jenerál Reformadu Lere Anan Timur iha nia rezidénsia maibé la konsege, tanba Jenerál Reformadu laiha fatin.
Ho razaun kampaña eleitorál ba eleisaun prezidensiál kandidatu Lere Anan Timur seidauk vizita nia to'os, tanba ne'e mak horseik (21/03) aproveita ba silu batar iha nia to'os ne’ebé halo iha Metinaro.
“Tanba durante ne'e Jenerál Lere gosta ema ne'ebé hader sedu, horseik (21/03) ne'e, bainhira nia hader sedu ne'e nia ba tiha Metinaro ba silu batar iha nia to'os, entaun tuku lima dader nia ba liu tiha se la sala purvolta sete oras doutor Marí ba hasoru, enfelizmente señór Jenerál la iha fatin, tanba ne'e mak labele hosoru doutor Marí, la'ós dehan taka odamatan”, deklara nia.
Tanba ne’e husu deskulpa ba oknum sira ne'ebé mak hasoru fotografia Marí Alkatiri iha portaun Rezidénsia Lere Anan Timur Faról, tanba Jenerál Lere Anan Timur la'ós taka odamatan ba Sekretáriu Jerál partidu FRETILIN Marí Alkatiri maibé nia ba to'os.
Alende ne'e Sekretáriu Jerál partidu FRETILIN mós laiha komunikasaun ofisiál ho Lere Anan Timur ho mós nia Ekipa sira iha Faról.
“Infelizmente laiha komunikasaun ofisiál ida, tuir loloos ne'e Ekipa kandidatu Francisco Guterres Lú Olo tenke halo komunikasaun ofisiál, sira iha laran koñese ami barak, até ha'u rasik mós sira koñese tanba Kamarada ida, koñese hela ami ne'e bele komunika”, akresenta nia.
Tanba Lere Anan Timur hakarak simu bainaka ho deve ser ka ho loloos, tanba ida ne'e molok ba vizita presiza iha komunikasaun antes ho Ekipa no Jenerál Reformadu Lere Anan Timur. (*)