“Hako'ak boot ba elementu PLP elementu FRETILIN, elementu KHUNTO, e sira ne'ebe hola parte ba apoia kandidatu seluk, atu vota ba ita. Primeiru ha’u hatete ba sira, eleisaun ne'e la'ós eleisaun ba Parlamentu, ne'e eleisaun ba Prezidente, entaun di'ak liu vota ba ha'u”, dehan Horta bainhira hala'o kampaña polítiku ho tipu diálogu iha Munisípiu Manatutu, tersa (05/04).
Nu’udar kandidatu ba Prezidente Repúblika, sei buka hako'ak militante husi partidu tolu liliu militante husi FRETILIN tanba uluk nia hanesan fundadór ba ASDT-FRETILIN, nunka hatuun orden kontráriu ba partidu FRETILIN.
“Iha 2007 kuandu ha’u kandidatu-an ba FRETILIN, sira dehan eih sira ataka ha’u hanesan agora atake ne'e, ha'u ba tiha eleitu Prezidente 2007, ha’u konvida elementu lubuk ida mai servisu iha prezidénsia, balun ba embaixadór, nune'e sira hakfodak, tanba ema sira ke iha espiritu kultura radikál ne'e sempre ho konfrontasaun, sira la kompriende ho hakfodak kuandu o atake ema ne'e e depois nia mak hako'ak fali o”, esplika Horta.
Maske, iha apoiante balun ne'eb’e tauk tauk atu lakon entaun inventa buat oioin, maibé nia nein hirus tanba buat ne'e normal no akontese iha vida polítika.
Iha ne'e, husu ba militante KHUNTO lalika hakfodak, lalika rona sira nia Konselleru Superior Partidu KHUNTO, Naimori Bukar ko'alia, maibé di'ak liu vota ba nia.
“Naimori ne'e ha'u-nia tiun rasik, ami na'in-rua boot hamutuk iha Ainaro, ami hasoru malu ko'alia Manbae de'it, tanba nia tetun mós ladún di'ak, e ba FRETILIN sira di'ak liu vota mai ha'u”, haktuir Horta.
Nune'e mós husu ba Manatutuoan atu halo esforsu dor to dor kada ba bairo, aldeia no suku iha Manatutu laran, atu nune'e sira ne'ebé la vota iha primeiru volta bele vota iha segundu volta maibé tenke vota númeru 1. (*)