Projetu ba proposta rezolusaun ne'e aprezenta husi Ministra Negósiu Estranjeiru no Kooperasaun, Adaljiza Albertina Xavier Magno ba KM no hetan aprovasaun.
“Tratadu ne’e atu bandu totál ensaiu nukleár (teste nuklear) ba objetivu militár, hanesan forma hodi limita dezenvolvimentu hosi arma nuklear ne’ebé daudaun ne’e iha no aparesimentu hosi tipu arma nuklear foun sira, hanesan medida efikás dezarmamentu nuklear no la proliferasaun arma nuklear sira”, dehan Ministru Prezidénsia Konsellu Ministru (MPKM), Fidelis Leite Magalhães iha Palásiu Governu, sesta (13/05).
Ho rezolusaun ne’e, Timor-Leste hamutuk ho nasaun sira seluk ne’ebé ratifika ona tratadu ne’e konkorda katak labele kontinua tan ho teste nuklear sira iha mundu.
“Tanba teste sira ne’e bainhira kontinua nafatin sei kontribui ba proliferasaun ba arma nuklear sira no teste ne’e rasik bele mós iha risku ba saúde ita-ema nomós ba ambiente tanba teste iha fatin balun tuir istória hatudu katak iha ne’ebé mak koko teste sira dala barak iha kálkulu sira ne’ebé mak sala kona-ba diresaun anin no kona-ba reziduu sira no rezultadu hosi teste ne’e rasik maka ba fali afeta populasaun ka nasaun viziñu sira”, afirma nia.
Inisiativa hirak ne'e, atu evita arma nuklear labele prolifera iha mundu no atu evita katak ho teste sira ne’e la lori risku ba vida umana no ba ambiente. (*)