Tuir deputada Olinda Guterres, maske governu sentral tau osan ho montante boot ba RAEOA maibé la rezulta buat di'ak iha Oekusse, tanba nabilan só iha sidade de'it.
"Ohin señor Arsenio Paixão Bano dehan katak, Oekusse sai modelu ba Timor Leste, no dehan mós katak Oekusse sai husi izolamentu. Entaun modelu saida mak atu foti hodi sai modelu ba munísipiu seluk?," dehan deputada Olinda iha plenária PN, Tersa (29/10/19).
Membru komisaun D PN ne’e hatete, bainhira komisaun D hala’o fiskalizasaun iha RAEOA-ZEESM, nia seidauk haree buat di’ak iha Oekusse.
"Bainhira ami, husi komisaun D ba halo fiskalizasaun, kolega sira sei hela, maibé ha'u sai ba haree seidauk iha buat di'ak ida mak iha ne'ebá. Só iha estrada boot, iha eletrisidade lakan kapas, maibé laiha buat di'ak ida iha ne'ebá, ha'u mós atu xoke tanba estrada ne'ebé ita-boot sira loke ne'e hodi karreta loke ne'e la loos," dehan deputada ne’e.
Nia afirma, durante iha Oekusse nia nota katak so iha kapital Oekusse mak furak maibé sees husi ne’e laiha.
"Furak ne'e iha sidade de'it, sai ba li’ur ne'e nia limitasaun mak ne'e ona karik, iha señor Arsenio nia fatin ne'e mak furak mate, ne'e gaya mate tebes. Orsamentu ne'ebé ita-boot sira gasta milliaiun $439.734.835. Osan boot hanesan ne'e ba halo fali buat hanesan ne'ebá," Olinda kritika.
Entretantu, kestaun seluk hato’o husi deputadu PD no FRETILIN.
Deputadu bankada opozisaun ne’e kongratula Prezidente RAEOA interinu Arsenio Bano no eis Prezidente RAEOA Mari Alkatiri ne'ebé husik hela memória ne'ebé di'ak tebes iha Oekusse.
"Hanesan deputadu, hato'o parabéns ba ita-boot sira-nia esforsu hodi hetan susesu no progresu di'ak ba dezenvolvimentu iha Oekusse. Ami halo akompañamentu durante tinan lima ne'ebé liu ona, no tinan lima sei tuir mai, ne'ebé sei lidera husi prezidente foun," dehan deputadu PD Adrino do Nascimento.