Tuir informasaun ne'ebé www.tempotimot.com asesu iha Pájina Sekretáriu Estadu Kooperativa, Elizário Ferreira parabeniza ba dirijente no membru Kooperativa HOKIFU nia servisu no susesu durante ne’e.
“Fó parabéns ba dirijente no membru Cooperativa HOKIFU nian, tanba ho servisu maka'as no esforsu sira-nian mak ohin loron kooperativa bele iha ninia Sede rasik hodi hala'o atividade loroloron nian”, hatete nia.
Tanba ne'e, husu ba dirijente Kooperativa sira ne'ebé ejiste iha Munisípiu Aileu atu halibur malu hodi hari’i uniaun ida sai hanesan mahon ba kooperativa primária sira.
“Sekretáriu Estadu Kooperativa kontinua fasilitia formasaun kontinuasaun ba dirijente, fiskál, no jestór kooperativa sira, nune'e bele assegura estabilidade institusionál Kooperativa nian no assegura estabilidade finanseira no estabilidade ekonomia ba membru sira-nian. Kona-ba ekipamentu Sekretariadu nian ne'ebé menus husu atu halo proposta hodi sumete ba Sekretáriu Estadu Kooperativa, nune'e bele hala'o atividade Kooperativa nian lorloron funsiona ho di’ak”, dehan nia.
SEKOOP mós husu ba dirijente sira tenke sai hanesan lalenok ba membru sira hodi servì ho fuan hamutuk membru sira lori Kooperativa ba oin.
Iha tempu hanesan Prezidente CU HOKIFU, Abril Simoês agradese ba SEKOOP, Elizário Ferreira ninia prezensa hodi inaugura Sede Kooperativa nian, prezensa ne'e hanesan motiva dirijente no membru sira hodi serví Kooperativa di’ak liután.
Nune’e, la haluhan fó obrigadu ba parte hothotu ninia kontribuisaun, ne’ebé bele finaliza konstrusaun edifísiu Kooperativa nian.
Enkuantu orsamentu ba konstrusaun edifísiu refere mai husi CU HOKIFU rasik ho totál US $20.500,00 no apóiu husi SEKOOP US$7.500.
Prezensa iha seremónia ne'e, kompostu husi dirijente Kooperativa sira ne'ebé ejiste iha Munisípiu Aileu, Autoridade Lokál sira, nomós komunidade no membru Kooperativa sira. (*)