"Bainhira temi kona-ba eleisaun antesipada (EA) ita hotu alérjiku. Tanba ne'e, ha'u fiar katak na'i ulun no governanante sira, lider partidu polítiku sira no ita hotu lakohi atu enfrenta tan eleisaun antesipada ida," dehan Diretór Ezekutivu CEPAD, João Boavida, iha Palásiu Prezidensiál, Bairru-Pité, Kuarta (5/2).
Tuir nia, ukun na'in sira tenke tuur hamutuk rona malu ba, nunee ho orientasaun husi Prezidente Repúblika bele hetan alternativa seluk ne'ebé di'ak liu eleisaun antesipada.
CEPAD nia hanoin, bainhira mosu EA ninia kustu ne'e boot liu ba Estadu no ba povu.
"Ita hotu hakarak prevene ida ne'e," dehan João.
CEPAD rasik hataan konvite husi Prezidente Repúblika, Francisco Guterres Lú Olo, kona-ba situasaun impase polítika ne'ebé akontese.
Servisu ne'ebé CEPAD halo mak diálogu permanente, harii dame, no kontribui ba harii estadu hodi hametin pás.(*)