Prezidente Autoridade sei hamutuk ho autoridade lokal no lia-na'in sira hodi bele hamosu komprensaun komum hodi tau matan hamutuk ba prosesu dezenvolvimentu RAEOA liuhusi partisipasaun ativu Povu Enklave, Oekusi.
“Povu Oekusi iha direitu atu hatene kona-ba utilizasaun orsamentu ho ninia benefísiu tomak liuhusi realizasaun enkontru ho autoridade no xefe suku sira. Tanba prosesu dezenvolvimentu ne’ebé la envolve povu, difisil atu la'o ba oin” hateten Prezidente Autoridade RAEOA-ZEESM, Jose Luís Guterres, iha soru-mutu kona-ba “Seguransa Sosiál no Nia Benefísiu” ho funsionáriu RAEOA, autoridade lokál, iha Palaban-Oekusi, Kinta (13/2).
Lugu kontinua enkoraza ba entidade hotu iha Oekusi atu koopera ho autoridade atuál hodi kontribui nafatin hanoin krítika hadi'a buat ne’ebé la di'ak ba interese povu Oekusi.
Prezidente Autoridade RAEOA-ZEESM komprometidu hodi kontinua respeita nafatin ba buat ne’ebé autoridade anteriór halo ona hodi hadi'a hikas buat ne’ebé la di'ak ba interese povu Oekusi nian.
“Ha'u mai servisu ho fuan tomak. Se bainhira imi haree iha buat ruma la di'ak husu atu bele iha krítika hodi hadi'a,” dehan Lugu.
Kona-ba funsionáriu kontratadu hirak ne’ebé servisu husi tempu autoridade anteriór nian, Prezidente Autoridade RAEOA-ZEESM halo ona adisaun hodi estende kontratu funsionáriu kontratadu to'o fulan 6. Depois fulan 6, Autoridade RAEOA hamutuk ho Komisaun Funsaun Públika (KFP) sei loke konkursu públiku hodi fó mós opurtunidade ba entidade hotu hodi bele konkore ba vaga hirak ne’e.
Komprimisu ne’e hodi bele define profisionalizmu kada sidadaun liuliu Oekusi-oan hodi partisipa ativu iha prosesu dezenvolvimentu hodi la haree ba kartaun partidu A no B.
“Ha'u sei la hasai no hatama ema tanba kartaun. Ida ne’e ha'u nia komprimisu ba povu Oekusi. Tanba ha'u mai atu serví ho fuan tomak”, tenik nia.
Prezidente Autoridade RAEOA-ZEESM, sei hato’o mos pedidu no haree hikas fali tipu kontratu ba projetu hotu ne’ebe hala'o iha Oekusi hodi haree opurtunidade ba Oekusi-oan sira-nia envolvimentu iha obra hirak ne’e. (*)