Antes ne'e, liuhusi programa intervista televizaun nasionál GMN, Prezidente Partidu CNRT, Kay Rala Xanana Gusmão, deklara abertamente lakohi ona nia prte sei la halo diálogu ho partidu polítiku ne'ebé hetan asentu parlamentár hodi ukun iha governu foun mai no sei simu solusaun ne'ebe justu no demokratikamente liu mak Elisaun Antesipada.
Maibé, deklaraun ne'e la konsistente bainhira Xanana hasoru malu ho lider nasionál aumezmu tempu mediadór ba diálogu partidu polítiku, José Ramos Horta.
Iha soru-mutu entre Horta no Xanana, iha Kuarta (12/2), Xanana hakarak fali atu lidera koligasaun foun hodi forma IX Governu, ne'ebé sees malu ho ninia deklaraun iha média antes ne'e.
Bainhira dada-lia ho www.tempotimor.com, iha ninia knaar fatin, Faról, Segunda (17/2), Horta konfesa katak, Xanana iha ambisaun atu lidera fali koligasaun foun hodi kaer ukun.
"Nia (Xanana) prontu lidera koligasaun tanba nia hakarak estabilidade, mas prontu mós atu hakat ba eleisaun antesipada," dehan Horta.
Nia espilka, soru-mutu entre nia ho Xanana foin lalais ne'e, ko'alia oinsá atu utrapasa impase polítika no buka solusaun no aternativa.
Durante soru-mutu, Xanana hatudu ninia matenek no espíritu vontade atu hakotu impase, liuliu buka koligasaun no lidera formasaun Governu foun.
"Koligasaun bele lideradu husi CNRT. Di'ak liután bolu mós FRETILIN, PLP hola parte hanesan inkluzaun," tenik nia.
Ramos hatutan, Xanana hatudu nafatin respeita ba Mari Alkatiri no FRETILIN, maibe triste uitoan tanba Prezidente Repúblika tanba 'blokeia' membru Governu husi Partidu CNRT sem prova.
Entertantu, issue ne'ebé mosu iha públiku dadaun ne'e CNRT hahú halo komunikasaun ho partidu sira iha asentu parlamentár hanesan PD, KHUNTO, PUDD no UDT/Frente-Mudansa. (*)