Tuir Majór Jenerál Lere Anan Timur, la presiza atu halo ajitasaun ho marka Xanana iha Dili laran tanba Xanana Gusmão koñesidu iha mundu.

Nia dehan, institusaun defeza halo ona enkontru relasiona ho markasaun Xanana iha kapitál Dili.

Xefe Estadu rasik hatene naran ne'e mosu tanba relasiona ho situasaun polítika atuál no konsidera atu ne'e hanesan ajitasaun no propoganda polítika.

Lere dehan, uluk naran ne'e laiha, ikus mai situasaun polítika manas, derrepente naran Xanana mosu lemo-lemo iha fatin-fatin.

"Tuir ami-nia analiza ne'e hanesan ajitasaun ida. Ema hakarak hamanas situasaun", dehan nia, iha Palásiu Prezidensiál, Bairru-Pité, Kuarta (19/2).

Ne'e duni, Lere dehan, instituisaun PNTL no FALINTIL-FDTL matan moris nafatin hodi buka tuir sé mak halo propaganda sira ne'e no autór ne'e sei simu ninia konsikuénsia.

"Sira ne'ebé hakerek ne'e kuandu polisia toman tenke responsabiliza," dehan Jeneral Lere.

Jeneral fitun rua ne'e afirma, Xanana la'ós foin mak ema hatene, Xanana nia-naran rekoñese nasionál no internasionalmente dezde 1975.

Nia hatutan, naran Xanana, Ramos Hosta, Mari Alkatiri, la'ós naran foun. Sira ne'e maka lider istóriku no patrimóniu Estadu nian, ne'ebé naran boot ona dezde tempu rezisténsia.

Observasaun www.tempotimor.com iha terrenu, naran Xanana nian kuaze hakerek iha kintu-kantu parede Dili laran ho liafuan hanesan Viva Xanana, Ami Hadomi Xanana, no seluk tan. (*)