Diretora Jerál Prestasaun Saúde, Odete da Silva Viegas hatete, kuarentena ne'ebé governu prepara seidauk prienxe kritéria tanba sei iha ema na'in rua ka tolu mak hela iha kuartu ida.
"Hahú ohin ba oin mak karik iha kuarentena ne'e tau loos ema ida iha kuartu ida entaun ita bele kontrola di'ak liu tán, mais agora imi (jornalista) hotu hatene katak situasaun ita nian entaun ita halai ba hotel, mais buka susar, entaun ita akomula ema na'in rua iha kuartu ida," dehan Odete iha Sentru Konvensaun Dili, Domingu (27/03/2020).
Iha fatin hanesan, Ministra Saúde interina Élia dos Reis Amaral afirma, kondisaun kuarentena seidauk prienxe rekezitus.
"Ami rekoñese ida ne'e, mais fazeadamente tékniku hahú hadi'a ona, iha fatin balun ne'ebé mak ita-boot sira hatene iha kuartu ida tau ema na'in rua, tolu, entaun ami sei buka fatin par transfere fali sira ne'e balun ba fatin seluk ne'ebé ami prepara," dehan Ministra Élia.
Maske nune'e, Elia garante katak sei laiha transmisaun Covid-19 husi ema sira-nia kuarentena ba ema seluk, karaik ikus mai sira pozitivu Covid-19.
"Ami mós garante katak sira labele transmite virus ba ema seluk," dehan Élia.