Deputadu Bankada PD Mariano Assanami Sabino hasai ideia atu koa deputadu no governante sira-nia salariu hodi apoiu pesoál sira ne'ebé serbisu diretamente iha terenu.
"Ba ita hotu nia konsensia iha situasaun ida hanesan ne'e, ita mós servisu full no ita mós la diretamente tuun hodi apoiu, entaun se bele koa ita-nia saláriu 50% par apoiu ba sira ne'ebé moras iha ospital, pesoál saúde, polísia sira ne'ebé loron kalan hala'o serbisu," dehan deputadu ne'e iha plenária PN, Kuarta (01/04/2020).
Nia sujere atu koa salariu deputadu sira nian ba fulan Abril.
"Koa 50% ne'e hanoin katak iha Parlamentu de'it bele to'o rihun $90, aumenta ho governu nian, ha'u hanoin osan ne'e uitoan par bele apoiu nesesidade báziku ba ita-nia ema sira ne'ebé serbisu diretamente iha terenu," nia afirma
Iha fatin hanesan, deputada Olinda Guterres husi bankada KHUNTO deklara apoiu ideiai ne'e.
"Koa ami deputadu sira-nia osan 50% par fó atendimentu ba ita-nia funsionáriu sira ne'ebé hetan risku," dehan nia.
Hatan ba kestaun ne'e, Ministra Finansas interina Sara Lobo Brites dehan, atu koa saláriu tenke iha lei.
"Atu koa saláriu 50% ne'e ami presiza lei ruma par implementa, se lae, ami atu implementa oinsa," dehan Lobo.
Antes ne'e iha ona hanoin hanesan husi parte ezekutivu atu kua osan salariu mensal hodi kontribui ba solusaun Covid-19 no ajuda vitima inundasaun maibe problema nia hun maka lei ne'ebe presiza parte hotu nia aseitasaun.
"Ami hanoin presiza tebes kua ami membru governu sira ne'e nia salariu maibe lei maka sai obstakulu," dehan Governante ida ne'ebe husu tempotimor.com labele publika nia identidade lolo'os.