Iha Sesta (03/04), Ministru Obras Públika Salvador Pires asina ona akordu ho operadór telekomunikasaun Timor Telecom, Telemor no Telkomsel hodi transfere prepagu eletrisidade $15 ba kada kliente.
Ministru hatete, númeru hotline ne'ebé establese ona mak 12150. Númeru ne'e hahú funsiona iha Segunda.
"Númeru hotline ne'e bele komesa funsiona iha semana oin, Segunda (06/04). Kliente sira hela de'it iha uma sira mensajen sira-nia númeru rejistu kontadór mai hotline ne'e automatikamente númeru ne'e sei fó fali SMS ida ho Token ka númeru pulsa par sira ense ba kontadór," informa Ministru Salvador liu husi pajina facebook MOP, Sesta (03/04).
Ministru hatete, prepagu gratuita ne'e sei oferese de'it ba kliente ne'ebé iha númeru rejistu kontadór.
Tuir dadus, Salvador dehan, kliente EDTL ne'ebé rejistu hamutuk 160.555.
"Ne'ebé (kliente) sira-nia númeru rejistu no token sira ne'e ami entrega tiha ona ba sistema operadór sira, sira hatama sistema, automatikamente kuandu mensajen (tama), nia transfere dala ida de'it".
Ministru hatete, intensaun ida husi polítika ida-ne'e mak atu prevene konsumedór sira labele ba konsentra iha fatin ida hodi sosa prepagu.