Prezidente TAIS Felix de Jesus hato’o lamentasaun no kondena akontesimentu baku-malu ne'ebé involve grupu Timoroan balun iha Norte Irlanda, tanba tuir nia, ida ne’e la hatudu identidade loloos nu’udár timoroan iha estranjeiru.
“Rona tiha autoridade sira nia preokupasaun no indignasaun públika kona-ba insidente ne’e, TAIS labele subar ninia tristeza”, Felix de Jesus hakerek iha grupu facebook TAIS nian.
TAIS apela ba joven sira atu hela hakmatek iha uma no adere ba distansia sosial hodi hatudu netik sentidu solidariedade ba ema hirak ne’ebé mate mesak iha ospitál, familia rasik labele ba haré tanba kumpre regra husi Organizasaun Mundiál saúde.
“Husu atu habelar autoridade PSNI nia pedidu hodi fasilita investigasaun, nune’e husu ba maluk Timor-oan sira ne’ebé mak iha informasaun ruma, vídeo ka evidénsia bele hato'o hela ba polisia liu-husi telefone 101, temi ho referencia 1647, 13/06/2020!”, autoridade TAIS apela.