Reitór UNTL Francisco Miguel Martins hafoin asina MoU ho KI hatete, asina MoU ne’e marka tan pasu importante ida ba UNTL iha ninia prosesu dezenvolvimentu.
"Ohin UNTL marka pasu ida tan hodi asina MoU ho Konservasaun Internasionál atu dezenvolve instituisaun ida ne'e, ho nia karatér serví akadémiku, ensinu, peskiza no mós dedikasaun ba komunidade," dehan Francisco iha serimónia asina MoU ho KI, Sesta (19/06).
Tuir Reitór ne’e, asina MoU ho KI ne’e nu’udar mehi ne’ebé UNTL iha dezde uluk kedan no ohin mak foin bele realiza.
"Loron ohin ne'e, loron ne'ebé mehi hori uluk kedas, ne'ebé ohin ita konsege realiza duni, entre KI no UNTL, atu viabiliza potensialidade no mós konesimentu sira ne'ebé mak bele sustenta peskiza sientífika iha prosesu dezenvolvimentu siénsia no teknolójia," dehan nia.
Iha fatin hanesan, reprezentante KI, Manuel Mendes hatete, buat ne’ebé importante ba Timor-Leste mak tenke halo kooperasaun hodi bele tau-matan ba area protezida iha TL.
Nia hatutan, Timor-oan hotu tenke tau-matan hamutuk hodi dezenvolve area protezidu sira ne’ebé daudauk ne’e eziste.
Tuir nia, area protezita iha TL iha 46, hahú husi parke nasionál Nino Conis Santana to'o iha área Citrana Oekusse, inklui mota boot sira ne'ebé konsidera hanesan área bazes sinografikas hamutuk 191.
"KI la'ós serbisu de'it ba área rai maran, maibé ita hahú serbisu iha marítima ninian, entaun iha tinan barak ita konsege estabelese ka harii ona ai-marina protezidu kuaze 24, iha área Nino Conis Santana hamutuk 7, iha Atauru iha 12 no agora dadaun ita halo hela iha parte Atabae nian hamutuk haat," dehan nia.
Ba mota boot iha TL, Francisco dehan, durante ne’e KI esforsu atu halo espansaun iha rai maran hanesan parke nasionál Nino Conis Santana, Ligumaun iha munisípiu Lautem, mota Irabere, Fatu Masin no seluk tan.