Bolseiru médiku 23 mak sei iha Kuba, hala'o estudu espesialidade área klínika, husi ne’e, na'in-17 finaliza ona estudu dezde fulan-dezembru tinan 2020, no na'in-15 mak simu ona diploma hodi hein hela repatriasaun mai Timor-Leste.
Husi na'in-15 ne’e, kompostu husi espesialidade Cardiolojía 3, terapia intensiva 4, nefrolojía 3, neurolojía 1, endocrinolojía 2, no imagenolojía 2.
Maibé, iha prosesu repatriasaun ne'e, kansela dala rua ona sein justifikasaun bá médiku hirak ne'e.
Ho nune'e, Sekretáriu Jerál MNEK, Jorge Camões hatete, kona-bá kestaun ne'e husu Ministériu Transporte no Komúnikasaun MTK atu halo klarifikasaun, razaun saida mak hodi kansela Voo bá dala-2, ne'ebé tuir planu monu iha loron 2 fulan-fevereiru, no loron 12 fulan-marsu tinan 2021.
Dahuluk kansela Voo ne'ebé atu mai iha loron 2 fulan-fevereiru tinan 2021 ho Voo umaniáaria, rute Havana- Paris –Lisboa-Londres-Dubai, no loron 7 fulan-fevereiru Kuala-Lumpur-Dili. No segundu kansela tán Voo EuroAtlantic ne'ebé atu mai iha loron 12 fulan-marsu tinan 2021 laiha klarifikasaun.
"Prontu, kona-bá aviaun ne'e la'ós Negósiu Estranjeiru mak haree buat ne'e, ha'u sujere kona-bá ida ne'e, ita-boot ko'alia ho parte konsuladu ninian, no Ministériu Transporte no Komúnikasaun mak trata asuntu ne'e”, informa nia ba www.tempotimor.com liuhusi telfone, kuarta (17/03).
Nune'e, médiku na'in-15 ne'e, sei iha Kuba hodi hein repatriasaun mai Timor-Leste ho Voo ne'ebé tuir fali, maibé seidauk iha serteza ba loron no fulan. (*)