Tempotimor (Díli) – Tribunál Rekursu (TR), Kuarta (14/08/19) ofisialmente dekreta konstitusionalidade ba Lei kona-ba Rejiaun Administrativa Espesiál Oe-Cusse Ambeno (RAEOA).
Maski nune'e, Governu sei hein lei ne'e hetan promulga husi Prezidente Repúblika mak nomeia Prezidente Autoridade RAEOA-ZEESM foun.
Bainhira jornalista sira konfirma Primeiru Ministru kona-ba preferensia governu nian atu nomeia Prezidente RAEOA-ZEESM foun. Maibe PM dehan seidauk.
Ba jornalista, Kinta (15/08/19), Primeiru Ministru Taur Matan Ruak remata sorumutu ho Prezidente Repúblika hatete, parte Governu seidauk bele ko'alia kona-ba asuntu ida ne'e. PM dehan, sei hein lei ne'e hetan promulga husi PR.
"Seidauk. Tanba lei seidauk promulga. Seidauk promulga, ita seidauk bele ko'alia buat sira ne'e. Mas, to'o tempu ita boot sira (jornalista) sei hatene medida saida mak ami halo. Ita boot sira sei hatene," PM Taur informa.
Tuir informasaun ne'ebe besik liu ba koligasaun AMP informa dehan AMP ninia preferensia maka Xanana Gusmao sei asume hikas kargu prezidente ZEESM - RAEOA ninian
Parlamentu Nasionál (PN) foin lalais ne'e, liuhosi dekretu numeru 6/V husu para primeira alterasaun lei numeru 3/2014, 18 Juñu kona-ba RAEOA-ZEESM. Maibé, Tribunál Rekursu liuhosi juiz koletivu deside katak lei ne'e konstitusionál.
"Iha termu ida ne'e, hanesan fundamentais, nune'e delibera ona tuir koletivu juiz iha tribunál rekursu nian, ne'ebé la julga ho inkonstitusional ba Dekretu Parlamentu Nasional nian numeru 6/V (primeira alterasaun lei numeru 3/2014, 18 junu)," hakerek komunikadu imprensa husi Tribunál Rekursu ne'ebé Públika, Kuarta (14/08).