"Ami hakarak figura ida ne'ebé ema independente no mundu koiñese, aman ba nasaun ne'e hanesan prezidente repúblika ne'e ema ida ne’ebé mundu hatene, para bele hadi’a nasaun ida ne'e”, hatete Deputadu Bankada UDT, Francisco David Xavier do Carlos, iha PN, kuarta (24/11).
Tanba esperiénsia situasaun krize politika, lideransa ensi krize, inklui covid-19 ne’ebé mak Timor-Leste enfrenta ida ne'e prezidente repúblika nu’udar aman ba nasaun tenke hatene buka solusaun.
Dadaun ne'e parte UDT seidauk deklara apoiu kandidatu Prezidente Repúblika ida ne'ebé, tanba prosesu forma estrutura UDT nian foin mak hahú.
Maibé iha hanoin ne’ebé mak UDT antesipa katak kandidatura prezidente repúblika ne’ebé mai tenke inparsiál husi nia partidu no hanoin de'it interese nasionál.
Purtantu to'o agora UDT rasik kontinua esforsu forma nia estrutura iha baze atu nune'e prepara ba eleisaun parlamentar iha tinan 2023.
"Ami iha koligasaun, ami bele hetan 5, ida oinsá mak ami bele hetan kadeira barak liután”, hatete nia. (*)