"Ha'u dehan, ha'u ki'ak, ha'u la mai fó osan ba imi, ha'u mai fahe ha'u nia domin ba imi, husu mós imi nia domin mai ha'u, ida ne'e mak ha'u husu, tanba ohin loron ha'u rona, lider balun komesa fahe osan, iha Baukau, Manatutu, Baguia, Laga, ha'u dehan katak, iha osan fahe ba, ha'u laiha osan, ha'u fahe ha'u nia domin, i husu mós imi nia domin, ida ne'e mak ha'u nia hakarak," dehan Lere hafoin vizita Suku Kaikua, Postu Vemase, Munisípiu Baukau, kuarta (09/02).
Lere konsidera, hahalok fahe osan hanesan sosa votus husi povu, ida ne’e sei hamate demokrasia, hamate mós povu nia mehi no hakarak, tanba povu agora mós husu justisa no hakarak hakmatek ho dezenvolvimentu, povu la'os tane lima ba ema ida atu oferta de'it osan.
Lere kandidatu aan ba PR hakarak apoiu husi Partidu Fretilin la'os ho indepedente, maibé to'o ikus Sekretáriu Jerál Fretilin, Mari Alkatiri la simu no kontinua apoiu atual PR, Francisco Guterres Lú Olo.
Maske nune’e, Lere lori veteranus no rezisténsia tomak nia naran kandidatu aan ba PR periodu, maibé isin no klamar nafatin ema Fretilin.
"Avo Nana tula lima ba avo Ramos Horta, avo-avo tula liman ba malu, imi nia avo Mari mós tula lima ba imi nia avo Lú Olo, ha'u ema ida latula liman ba ha'u, la fó bensa ba ha'u, ita nu’undar katoliku, maromak sei tula liman ba ha’u sei fó bensa ba ha'u," dehan Lere
Maibé, Lere garante sei hetan fiar no bensaun husi povu, tanba terus hamutuk ho povu iha ai-laran durante tinan-47. (*)